U Biełarusi zaviaršajecca praca pa stvareńni jakasnych aŭtatras, jakija źviazvajuć kožny abłasny centr ź Minskam, zajaviŭ 21 kastryčnika premjer-ministr Andrej Kabiakoŭ padčas aznajamleńnia z chodam rabot pa rekanstrukcyi aŭtadarohi M6 Minsk — Hrodna.
«Rekanstrukcyja M6 — apošni krok da realizacyi idei ab tym, što kožny abłasny centr pavinien być źviazany ź Minskam darohami adpaviednaha kłasa. Ruch pa mahistrali intensiŭny, prajekt pa jaje rekanstrukcyi nam vielmi važny. Miarkujecca, što jon pavinien być zavieršany ŭ poŭnym abjomie ŭ kancy 2018 hoda», — cytuje premjer-ministra pres-słužba ŭrada.
U liku nastupnych aktualnych prajektaŭ — rekanstrukcyja aŭtadarohi M10 pamiž Brestam i Homielem. «Prajekt budzie realizoŭvacca na pryncypach dziaržaŭna-pryvatnaha partniorstva ź Jeŭrapiejskim bankam rekanstrukcyi i raźvićcia. Raźličvajem, što jon zapracuje ŭ najbližejšy čas», — adznačyŭ Kabiakoŭ.
Premjer-ministru taksama pradstavili pierśpiektyvy budaŭnictva ŭčastka abjaznoj darohi ŭ Hrodnie z rekanstrukcyjaj mosta, jaki budzie hatovy ŭ pačatku 2017 hoda.
Učastak darohi płanujecca pabudavać za srodki kitajskaj kredytnaj linii. Prajekt užo raspracoŭvajecca. Akramia budaŭnictva darohi jon praduhledžvaje rekanstrukcyju 300-mietrovaha čyhunačnaha mosta pad aŭtadarožny. Hety ŭčastak dazvolić źnizić aŭtamabilnuju nahruzku na Rumloŭski most i častku horada, pa jakich kožnyja sutki jeduć sotni vialikahruzaŭ z boku miažy. Daroha źviaža abjaznym šlacham dva supraćlehłyja mikrarajony horada. Paźniej płanujecca złučyć jaje z darohaj, jakaja viadzie ŭ Litvu. Takim čynam buduć zabiaśpiečany zručnyja znosiny M6 z vyjezdam nie tolki na polskuju, ale i na litoŭskuju miažu.
Kiraŭniku ŭrada taksama dałažyli ab płanach pa spałučeńni aŭtatras z polskim i litoŭskim bokam, kab mižnarodnyja transpartnyja kalidory praciahvalisia adpaviednym kłasam daroh pa roznyja baki miežaŭ. «Razumieńnie jość, dumaju, što ŭ najbližejšyja try-čatyry hady našy hramadzianie ŭ poŭnaj miery adčujuć kamfort ad hetaj pracy», — padkreśliŭ Andrej Kabiakoŭ.
Acaniŭšy chod rekanstrukcyi aŭtadarohi M6, jakaja viadziecca za srodki Suśvietnaha banka, jon adznačyŭ efiektyŭnaje supracoŭnictva Biełarusi z bankam. «Heta vyhadnaje dla nas supracoŭnictva viadziecca nie adno dziesiacihodździe. Važna, što, pastupova viartajučy kredyt, my značna raniej atrymlivajem mahčymaść karystacca vynikami prajektaŭ», — dadaŭ premjer-ministr.
Da 2018 hoda treba budzie rekanstrujavać ŭčastki aŭtadarohi M6 z 57,3 km pa 130,4 km i z 197,7 km pa 211 km. Štodnia na abjekcie pracujuć kala 400 čałaviek i 330 adzinak techniki. 14—23 vieraśnia adbyŭsia vizit hrupy śpiecyjalistaŭ Suśvietnaha banka, jakaja zastałasia zadavolenaja chodam vykanańnia rabot na pačatkovych etapach.
