Hienieralnym dyrektaram vystupajučaha ŭ Kantynientalnaj chakiejnaj lizie minskaha «Dynama» pryznačany Anatol Kurylec, jaki raniej zajmaŭ u kłubie pasadu namieśnika hienieralnaha dyrektara pa biaśpiecy.
Kiraŭnik MUS Ihar Šunievič (sprava) vypraŭlaje na piensiju Anatola Kurylca. Fota mvd.gov.by
Bolš za hod kłub pracavaŭ biez hiendyrektara — paśla taho jak 20 lipienia 2015 hoda byŭ aryštavany Maksim Subotkin, jaki zajmaŭ hetuju pasadu. Vykonvajučym abaviazki hiendyrektara ŭ hety čas byŭ Pavieł Burba.
18 kastryčnika 2016 hoda sud prysudziŭ Subotkina da piaci hadoŭ pazbaŭleńnia voli pa abvinavačvańni ŭ złoŭžyvańni słužbovymi paŭnamoctvami, pieravyšeńni słužbovych paŭnamoctvaŭ i słužbovaj chałatnaści.
48-hadovy ŭradženiec Žytkavickaha rajona Anatol Kurylec — były vajenny, apošnija dziesiać hadoŭ pierad prychodam u minskaje «Dynama» słužyŭ u orhanach unutranych spraŭ, byŭ namieśnikam načalnika UUS Viciebskaha abłvykankama, namieśnikam ministra ŭnutranych spraŭ Biełarusi.
Jak adznačyŭ, kamientujučy kłubnaj pres-słužbie pryznačeńnie Kurylca, staršynia naziralnaha savieta CHK «Dynama-Minsk» ministr unutranych spraŭ Ihar Šunievič, razhledzieŭšy roznyja varyjanty, naziralny saviet pryjšoŭ da «aptymalnaha rašeńnia — pryznačyć na adkaznuju pasadu čałavieka, jaki maje vielizarny kiraŭnicki i žyćciovy dośvied».
Pa słovach Šunieviča, za tyja paŭtara hoda, jakija Kurylec zajmaŭ pasadu namieśnika hiendyrektara pa biaśpiecy, jon «paśpieŭ pahłybicca va ŭsie kirunki dziejnaści kłuba, vyvučyć unutranyja administracyjnyja i kamiercyjnyja pracesy». Kiraŭnik naziralnaha savieta padkreśliŭ, što pryznačeńnie Anatola Kurylca «nie praduhledžvaje revalucyjnych źmianieńniaŭ u stratehii raźvićcia kłuba». «Dynama» praciahnie ruchacca ŭ vybranym kirunku, damahajučysia vysokich spartyŭnych vynikaŭ i praciahvajučy zastavacca bazavym kłubam nacyjanalnaj zbornaj», — zajaviŭ Šunievič.
Vykonvajučy abaviazki hiendyrektara Pavieł Burba praciahnie pracu ŭ «Dynama» na pasadzie namieśnika hiendyrektara i budzie kuryravać spartovy kirunak, upraŭnieńnie markietynhu i kamiercyjnych prajektaŭ, a taksama pres-słužbu.
