Kiraŭnik adździeła brend-mieniedžmientu velcom Źmicier Kurłovič raspaviadaje pra bukkrosinh u miežach prajektu Movabox.
U roznych kaviarniach i art-prastorach Minska i inšych haradoŭ krainy źjaviacca admysłovyja skryni z samymi roznymi biełaruskamoŭnymi knihami našych sučaśnikaŭ. Kali ŭbačycie taki movaboks, śmieła biarycie adtul štości pačytać, tolki potym nie zabudźciesia viarnuć nazad.
Kampanija abiacaje sačyć za tym, kab boksy nie pustavali, i zaklikaje dałučacca ŭsich achvotnych. Kali na vašych palicach jość biełaruskamoŭnyja knihi sučaśnikaŭ, možacie pakidać ich u boksach.
Ale biełaruskamoŭny bukkrosinh — tolki častka prajekta.
Kampanija padrychtavała admysłovyja movaboksy tym, chto cikavicca biełaruskaj litaraturaj. U ich schavany tvor i roznyja rečy-simvały, jakija skiroŭvajuć da jaho padziej i hierojaŭ. Takim čynam ažyvili čatyry knihi i dla kožnaj vyrabili pa 20 movaboksaŭ.
Kab zapisacca ŭ šerahi achvotnych ich atrymać, treba ŭsiaho tolki prajści test na sajcie prajekta. Ciapier dali start rozyhryšu pieršaj knihi-boksa i praz šeść tydniaŭ abiaruć 20 ščaśliŭčykaŭ, jakim jany dastanucca. Paśla pačniecca rozyhryš nastupnaha tvora.
Pieršy movaboks stvorany pa tvoru Ludmiły Rubleŭskaj «Avantury studyjozusa Vyrviča». Heta adna z častak sieryi pra padarožžy i pryhody Pranciša Vyrviča ŭ žanry histaryčnaha fentezi.
Ludmiła Rubleŭskaja.
Piśmieńnica da apošniaha nie viedała, što apyniecca ŭ movaboksie. Daznałasia jana tolki na prezientacyi prajekta, jakaja prajšła 27 kastryčnika.
«Kali vy projdziecie test, u jakim daviedajeciesia, jaki vy hieroj tvora, to treba ž budzie pračytać, što Rubleŭskaja napisała mienavita pra vas, pra vašaha piersanaža, — skazała Ludmiła i najpierš dastała sa skryni sam tvor. — A heta što ŭ nas? Mahičny kryštal, jaki možna vyroščvać. Vy nibyta patrapicie ŭ majsterniu Baŭtramieja Lodnika. Akramia taho, što jon doktar, jon jašče i ałchimik. Lodnik nie tolki zdabyvaŭ fiłasofski kamień, ale taksama zajmaŭsia vyroščvańniem kamianioŭ-kryštalaŭ. U knizie maje hieroi traplajuć u Anhliju, dzie ich abkradajuć, i jany dumajuć, jak im zdabyć hrošy, jakija im prosta nieabchodnyja. Spadarožniki prapanoŭvajuć Baŭtramieju Lodniku zaniacca vyroščvańniem kaštoŭnych kamianioŭ. I voś vy zmožacie doma taksama hetym zaniacca».
Dalej Ludmiła dastała miašečak z manietkaj. I patłumačyła, u čym jaho niezvyčajnaść.
«Kali maje hieroi adpłyvajuć u Anhliju z Hdańska, tam sustrakajecca fantan Niaptuna. Pa zvyčai, kab marskoje padarožža ŭdałosia, treba tudy kinuć manietku. A moj Baŭtramiej Lodnik duža prahresiŭny doktar i zmahajecca z zababonami. Jon nie daje Prancišu Vyrviču kinuć manietku. U rešcie rešt ich karabiel traplaje ŭ strašenny štorm, i jany ledźvie vyratoŭvajucca. Voś ciapier u vas budzie takaja manietka, i vy zmožacie kinuć jaje nie tolki ŭ fantan Hdańska, a ŭ luby fantan, rečku ci voziera. Tudy, kudy chočacie viarnucca», — skazała piśmieńnica.
Dalej jana dastała sa skrynki kartu padarožžaŭ hierojaŭ z nalepkami, kab možna było nie tolki pračytać, dzie jany byli, ale i prasačyć pa karcie. Paśla — recept vieraščaki, stravy, jakaja ŭvajšła ŭ modu ŭ 18 stahodździ i jakuju jeli hieroi tvoru. Tut ža ŭ skryncy taksama adšukaŭsia mahnicik z adnaho z haradoŭ, dzie apynulisia hieroi. Apošnim Ludmiła dastała natatnik z čornymi staronkami i ručku.
«Heta, kaniečnie, samaja nieabchodnaja reč dla hierojaŭ, jakija žyvuć u śviecie ałchimii i mistyki. Natatnikaŭ u ramanie ažno niekalki. Adzin natatnik Pranciš Vyrvič atrymaŭ u spadčynu ad svajho siabra, jaki zahinuŭ. Kaniečnie, Baŭtramiej Lodnik taksama nie moža abyścisia biez natatnika. Vy možacie pačać zapisvać siudy pačutyja niezvyčajnyja mistyčnyja historyi», — prapanavała Rubleŭskaja.
Juryj Žyhamont.
Na sustrečy vystupiŭ taksama nastaŭnik prajekta «Čytajem pa-biełarusku z velcom», viadomy padarožnik Jury Žyhamont.
«My jeździm pa biełaruskich škołach, pa haradach i miastečkach. Dumajem, što piarojdziem i da biełaruskich viosak. Raskazvajem dzieciam pra biełaruskuju litaraturu, biełaruskich piśmieńnikaŭ. My pracujem ź dzietkami, jakija chodziać u pieršy, druhi, treci kłas, u ich tolki pačynajucca ŭroki ŭ škole pa biełaruskaj movie i litaratury. U ich vočki vielmi harać, kali pačynaješ raskazvać pra našych biełaruskich piśmieńnikaŭ, pra toje, što jany pišuć. I mienavita z hetaha prajekta naradziŭsia Movabox. My stali natchnialnikami hetaha prajekta, i ja dumaju, jon hetaksama budzie karystacca pośpiecham», — vykazaŭ spadzieŭ Jury.
Velcom maje nadzieju, što Movabox dapamoža źmianić ujaŭleńnie biełarusaŭ pra sučasnuju litaraturu. Pakazać, što našy piśmieńniki pišuć daloka nie tolki pra viosku i vajnu.
