Kraŭdfandynhavyja technałohii padtrymki roznych sacyjalna- i kulturnaznačnych prajektaŭ apošnim časam stali vielmi papularnymi ŭ Biełarusi. Siarod ich šmat idej i prapanoŭ, nakiravanych na stvareńnie novych praduktaŭ na biełaruskaj movie dy pryśviečanych papularyzacyi našaj kultury, simvałaŭ, tradycyj i historyi.
Pradstaŭlajem vašaj uvazie top-5 cikavych i važnych prajektaŭ, jakija varta paśpieć padtrymać da kanca 2016 hoda na płatformie Talaka.by, kab cudoŭnyja i značnyja dla hramadstva idei ažyćciavilisia.
Kali vas zacikaviać hetyja prajekty i rečy, to ŭžo zaraz pa spasyłkach da prajektaŭ možna stać partniorami, sponsarami, paabiacać ich nabyć ci adrazu pieraličyć hrošy zhodna z prapanovami ŭ raździele «Zbor srodkaŭ».
«Maja Radzima — Biełaruś» — kniha-malavanka dla tvorčaści i natchnieńnia (sabrana 46%)
«Maja Radzima Biełaruś» — heta kniha-malavanka pa-biełarusku dla tvorčaści, natchnieńnia i adpačynku, vynik kalektyŭnaj pracy kamandy «Art-siadziby» i Symbal.by, biełaruskich mastakoŭ, dyzajnieraŭ, paetaŭ i vydaŭcoŭ.
«MRB» — heta duša našaj krainy, jakuju aŭtary knihi admysłova pakinuli čorna-biełaj, kab kožny ŭładalnik vydańnia zrabiŭ jaje kalarovaj, jakoj bačyć i adčuvaje sam.
Pieršaja kniha ŭ dvuch farmatach (albom — kniha, albom — kniha — nabor paštovak) źjavicca na pačatku zimy da Kaladaŭ.
Vydańni art-terapii pa-biełarusku buduć składacca z 40 čorna-biełych malunkaŭ i vieršaŭ, nadrukavanych na śpiecyjalnym kardonie ź jakasnaj vokładkaj, zmacavanych spružynaju. Spadarožnymi praduktami knihi stanuć skietčbuki, cišotki, nabory nalepak z malunkami z vydańnia, a taksama firmovyja ałoŭki i asadki dla malavańnia «MRB».
Padtrymać prajekt možna TUT!
«Bahač» — biełaruskaja ekanamična-histaryčnaja nastolnaja hulnia (sabrana 29%)
Na siońniašni dzień biełaruskamoŭnych nastolnych hulniaŭ isnuje zusim mała, i amal usie jany pradstaŭleny na symbal.by. Aŭtary hetaha prajekta chočuć vyrašyć hetuju prablemu, stvaryŭšy cikavuju i zajmalnuju hulniu z nacyjanalnym kałarytam.
Ekanamičny składnik hulni navučyć vas finansavaj hramacie i pravilnamu raźmierkavańniu hrošaj na vydatki, a histaryčnaja častka pakaža, jakim byŭ horad Minsk u minułych stahodździach, jakija vulicy i šlachi davali šaniec tahačasnym žycharam nabivać svaje skarbonki i kišeni talerami.
Nastołka budzie składacca z hulniavoha pola z nazvami staradaŭnich vulic Minska, histaryčnaj mapy horadu, kartak na majomaść i na kamunalnyja pradpryjemstvy, fišak i dźviuch ihralnych kaściej.
Tym samym «Bahačom» i simvałam hulni na vokładcy staŭ nie prydumany piersanaž, a realnaja asoba, u svoj čas ministr finansaŭ BNR, biełaruski palityčny i hramadska-kulturny dziejač — Piotr Antonavič Kračeŭski. Delehat Pieršaha Usiebiełaruskaha źjezda, siabra Rady BNR, ministr finansaŭ BNR, a sa śniežnia 1919 hoda — prezident Rady BNR. Jon vykonvaŭ hetyja abaviazki da kanca žyćcia ŭ emihracyi, paśla prychodu balšavikoŭ na našyja ziemli.
Nastołka «Bahač» — vydatny varyjant, kab pravieści cikavy i pryjemny viečar ź siabrami, tamu varta paŭdzielničać u ažyćciaŭleńni prajekta!
Padtrymać prajekt možna TUT!
Kalandar na 2017-ty «Hod z vycinankaj» (sabrana 34%)
Kalandar «Hod z vycinankaj» z pracami Niny Sokałavaj-Kubaj budzie vydadzieny z metaju papularyzacyi vycinanki — tradycyjnaha vidu mastactva Biełarusi.
Kalandar pabačyć śviet naprykancy listapada 2016 hoda. Vydańnie budzie składacca z 13 listoŭ farmatu A4, na jakich raźmieściacca tematyčnyja vycinanki na kožny miesiac, dapoŭnienyja kalandarnaj sietkaj. Pracujuć nad kalendarom mastačka Nina Sokałava-Kubaj i dyzajnierka Tamara Mieljaniec.
Vycinanka — vid dekaratyŭna-prykładnoha mastactva, ažurny ŭzor, vyrazany z papiery, jaki atrymaŭ raspaŭsiud u Biełarusi, Polščy i Ukrainie.
Tradycyjna hałoŭnymi vobrazami vycinanak źjaŭlajucca ptuški, tamu nie vypadkova, što ŭ asnovie bolšaści siužetaŭ i na vokładcy kalendara — ptuški. Taksama, zhodna z uschodnim haraskopam, jakoha lubiać prytrymlivacca biełarusy, simvałam 2017 hoda źjaŭlajecca čyrvony vohnienny pievień.
Padtrymać prajekt možna TUT!
Padarunak dla Baradulina — dysk piesień z Vušaččyny (sabrana 46%)
Meta hetaha prajekta — vydańnie dyska narodnych piesień «Pieśni matčyny z Vušaččyny» z małoj radzimy Ryhora Baradulina.
Aŭtary prajekta vyrašyli pieraasensavać i adnavić vušackija pieśni, jakija ź dziacinstva Ryhoru Baradulinu śpiavała jaho maci. Hetyja pieśni natchniali i supravadžali paeta ŭsio žyćcio. Sioleta 24-ha lutaha, u dzień narodzinaŭ Ryhora Baradulina, u Biełaruskaj dziaržaŭnaj fiłarmonii adbyŭsia śviatočny kancert «Pieśni matčyny z Vušaččyny». Viadomyja etna-hurty ažyvili narodnyja pieśni z małoj radzimy dziadźki Ryhora.
Udzielnikami prajekta stali: hurt «Re1ikt», etna-hurt «Vuraj», kalektyŭ «Harmonic style project», falkłorny hurt «Varhan», Irena Katvickaja, Viktar Siamaška, paet Michaś Skobła. Śpis udzielnikaŭ dapaŭniajecca: prymajucca prapanovy ad inšych hurtoŭ.
Na dysku, akramia kampazicyj sučasnych muzykaŭ, buduć jašče i aryhinalnyja zapisy śpievaŭ maci paeta — Kuliny Baradulinaj, a taksama śpievy samoha Ryhora Baradulina.
Vydańnie dyska płanujecca ŭ śniežni 2016 hoda, a śviatočnaja prezientacyja ŭ Minsku ŭ vialikaj zale fiłarmonii — 24 lutaha 2017, u dzień naradžeńnia Ryhora Baradulina. Paśla muzyki padrychtujuć prezientacyju kružełki i ŭ inšych haradach Biełarusi.
Padtrymać prajekt možna TUT!
Vydańnie druhoj častki knihi «Mova Nanova: 20 krokaŭ da biełaruskaj movy»(sabrana 13%)
Pieršuju častku knihi «Mova Nanova: 20 krokaŭ da biełaruskaj movy» napisali aŭtary i viadoŭcy papularnych kursaŭ biełaruskaj movy «Mova Nanova» Alesia Litvinoŭskaja i Hleb Łabadzienka. Kniha ŭklučaje 20 tematyčnych raździełaŭ. Kožny raździeł — heta słoŭnik pa temie z prykładami na kožnaje słova + hramatyčny błok z praktykavańniami + cikavinki.
Tym časam kolkaść urokaŭ, padrychtavanaja aŭtarami, dasiahnuła 110-ci. A heta značyć, što pryśpieŭ čas vydavać praciah knihi, zrabiŭšy jaje sieryjaj!
U druhuju častku ŭvajšli takija temy, jak «Hrošy», «Rovary», «Mastactva», «Žyviolny śviet», «Zdarovaje charčavańnie», «Rybałka», «Cyrulnia», «Hatel» dy inšyja. Aproč taho, try častki knihi pryśviečany vybitnym biełarusam: Jakubu Kołasu, Vasilu Bykavu i Ryhoru Baradulinu. U novaj knizie vy znojdziecie nie banalnyja bijahrafii kłasikaŭ, redkija i nieviadomyja fota, prykłady ich aŭtarskaha stylu.
Padtrymać prajekt možna TUT!
Vašaja padtrymka hetych prajektaŭ dazvolić častkova pakryć vydatki na ich padrychtoŭku na stadyjach raspracoŭki, zapisu, viorstki i stvareńnia dyzajnu. Pa skančeńni kampanij pa zbory srodkaŭ vy pieršymi atrymajecie hatovy pradukt i roznyja inšyja bonusy pa abiacanych u prajektach koštach i značna tańniej, čym astatnija pakupniki, paśla źjaŭleńnia hetych rečaŭ i vydańniaŭ u šyrokim prodažy.
Varta było b nazvać hety śpis «Top-5 aryhinalnych kaladnych padarunkaŭ».
Kali vy padtrymajecie hetyja cudoŭnyja prajekty, to vam nie daviadziecca šukać inšyja varyjanty, čym ździvić svaich blizkich na Kalady: vy zmožacie pavinšavać ich aryhinalna i pa-biełarusku!
