7 śniežnia 2015 hoda Basmanny sud Maskvy prysudziŭ da troch hadoŭ ahulnaha režymu apazicyjnaha aktyvista Ildara Dadzina — za «nieadnarazovaje parušeńnie pravił praviadzieńnia publičnaha mierapryjemstva». U 2014 hodzie Dadzina čatyry razy zatrymlivali i pryhavorvali da štrafu za ŭdzieł u niaŭzhodnienych z uładami akcyjach. Heta pieršy ŭ Rasii prysud pa novym artykule ŭ Kryminalnym kodeksie.
Ildar Dadzin. Fota: Vasil Piatroŭ / Facebook
«Mieduza» publikuje list Ildar Dadzina žoncy Anastasii Zotavaj, u jakim jon paviedamlaje pra katavańni ŭ siehiežskaj kałonii VK-7, arhanizavanyja načalstvam. FSVP paćvierdziła prymianieńnie siły da źniavolenaha. Dadzin — pieršy z asudžanych pa artykule «nieadnarazovaje parušeńnie ŭstalavanaha paradku arhanizacyi albo praviadzieńni zboru, mitynhu» (212.1 KK). Da kryminalnaj adkaznaści jaho pryciahnuli za zatrymańni na adzinočnych pikietach.
List zapisany 31 kastryčnika 2016 hoda advakatam Alaksiejem Lipceram sa słoŭ Dadzina.
«Naścia! Kali vyrašyš apublikavać infarmacyju ab tym, što adbyvajecca sa mnoj, to pasprabuj raspaŭsiudzić jaje jak maha bolš šyroka. Heta pavialičyć šancy na toje, što ja zastanusia žyvy. Viedaj, što ŭ kałonii VK-7 dziejničaje cełaja mafija, u jakoj udzielničaje ŭsia administracyja ŭstanovy: načalnik kałonii — major unutranaj słužby Kosijeŭ Siarhiej Leanidavič i absalutnaja bolšaść supracoŭnikaŭ kałonii, uklučajučy lekaraŭ.
Z samaha prybyćcia ŭ kałoniju 10 vieraśnia 2016 hoda ŭ mianie adrazu adabrali praktyčna ŭsie rečy i padkinuli dva laza, a zatym pry pieratrusie «znajšli» ich. Tut heta paŭsiudnaja praktyka — užyvajecca dla taho, kab abaviazkova pasadzić iznoŭ prybyłych u ŠIZA, kab jany adrazu zrazumieli, u jakoje piekła trapili. U štrafny izalatar mianie adpravili biez usialakich pastanoŭ, ale pry hetym adabrali ŭsie rečy, uklučajučy myła, zubnuju ščotku, zubnuju pastu i navat tualetnuju papieru. U adkaz na hetyja niezakonnyja dziejańni ja abviaściŭ haładoŭku.
11 vieraśnia 2016 hoda da mianie pryjšoŭ načalnik kałonii Kosijeŭ z tryma supracoŭnikami. Jany razam pačali mianie źbivać. Usiaho źbivali za hety dzień čatyry razy, pa 10-12 čałaviek adnačasova, bili nahami. Paśla treciaha źbićcia apuścili hałavu va ŭnitaz prosta ŭ kamiery ŠIZA.
12 vieraśnia 2016 hoda pryjšli supracoŭniki, skavali mnie ruki za śpinaj i padviesili za kajdanki. Takoje padviešvańnie pryčyniaje strašny bol u zapiaściach, akramia taho, vykručvajucca łokcievyja sustavy, i adčuvaješ dziki bol u śpinie. Tak ja visieŭ paŭhadziny. Potym źniali ź mianie trusy i skazali, što zaraz pryviaduć inšaha viaźnia i jon mianie zhvałcić, kali ja nie pahadžusia spynić haładoŭku. Paśla hetaha — pryviali da Kosijeva ŭ jaho kabiniet, dzie jon u prysutnaści inšych supracoŭnikaŭ skazaŭ: «Ciabie jašče mała bili. Kali ja addam rasparadžeńnie supracoŭnikam, ciabie buduć źbivać značna macniej. Pasprabuješ paskardzicca — ciabie zabjuć i zakapajuć za płotam». Potym źbivali rehularna, pa niekalki razoŭ na dzień. Pastajannyja źbićci, ździeki, źniavahi, abrazy, nievynosnyja ŭmovy ŭtrymańnia — usio heta adbyvajecca i ź inšymi viaźniami.
Usie dalejšyja spahnańni i vypravadžeńni ŭ ŠIZA byli sfabrykavanyja i zasnavanyja na adkrytaj chłuśni. Usie videazapisy, na jakich mnie abjaŭlali spahnańni, — pastanovačnyja: pierad tym jak ich zdymać, mnie kazali, jak siabie pavodzić i što rabić — nie spračacca, nie piarečyć, hladzieć u padłohu. Inakš kazali, što zabjuć i nichto pra heta nie daviedajecca, tamu što nichto navat nie ŭ kursie, dzie ja znachodžusia. Ja nie mahu adpraŭlać listy, abminajučy administracyju, a administracyja abiacała mianie zabić u vypadku, kali ja budu pisać skarhi. Naścia, u maim pieršym liście z VK-7 ja pisaŭ tabie pra JESPČ, kab abyści cenzuru i dać choć najmienšy namiok ab tym, što ŭ mianie nie ŭsio ŭ paradku i mnie patrabujecca dapamoha (ni adzin ź listoŭ Ildara z kałonii mnie nie pryjšoŭ — zaŭv. Anastasii Zotavaj).
Ja prašu ciabie apublikavać hety list, bo ŭ hetaj kałonii sapraŭdnaja infarmacyjnaja błakada — i ja nie baču inšych mahčymaściaŭ jaje prarvać. Ja nie prašu mianie adsiul vyciahvać i pieravodzić u inšuju kałoniju: ja nieadnarazova bačyŭ i čuŭ, jak źbivajuć inšych asudžanych, tamu sumleńnie nie dazvolić mnie adsiul biehčy — ja źbirajusia zmahacca, kab dapamahčy astatnim. Ja nie bajusia śmierci i bolš za ŭsio bajusia nie vytrymać katavańniaŭ i zdacca.
Kali ŭ Rasii jašče nie źniščany «Kamitet suprać katavańniaŭ», ja prašu ich dapamahčy ŭ zabieśpiačenni prava na žyćcio i biaśpieku dla mianie i inšych źniavolenych. Ja prašu abvieścić infarmacyju pra toje, što major Kosijeŭ naŭprost pahražaje zabojstvam za sproby skardzicca na toje, što adbyvajecca. Ja budu rady, kali ty znojdzieš advakata, jaki zmoža pastajanna znachodzicca ŭ Siehiežy i akazvać jurydyčnuju padtrymku.
Čas hulaje suprać mianie. Videazapisy z kamier nazirańnia dakazali b i katavańni, i źbićci, ale na toje, što jany zachavalisia, zastajecca ŭsio mienš i mienš šancaŭ. Kali mianie zaraz znoŭ buduć katavać, źbivać i hvałcić, ja naŭrad ci pratrymajusia bolš za tydzień. U vypadku majoj raptoŭnaj chutkaj śmierci tabie mohuć skazać, što pryčynaj tamu stała samahubstva, niaščasny vypadak, streł pry sprobie ŭciokaŭ abo bojka ź inšym źniavolenym, ale heta budzie chłuśnioj, heta budzie spłanavanaje administracyjaj zabojstva z metaj prybrać śviedku i achviaru katavańniaŭ.
Kachaju ciabie i spadziajusia kali-niebudź ubačyć. Tvoj Ildar»
