U siaredzinie listapada ŭ Hrodnie pačnie pracu pieršaja ŭ krainie aŭtamyjka na soniečnych batarejach. Pra heta paviedamiŭ aŭtar idei, dyrektar hrodzienskaha PSUP «OlšynaAŭta» Dźmitryj Sićko, piša BiełTA.
U Hrodnie zaviaršajucca padrychtoŭčyja pracy pa zapusku pieršaj myjki samaabsłuhoŭvańnia, jakaja budzie «siłkavacca» nie ad ahulnaj sietki, a ad soniečnych batarej. Źjavicca jana na parkoŭcy ŭ spalnym rajonie Višniaviec.
«Jašče raniej, kali tolki zakładvali parkoŭku, zapłanavali na joj miesca pad soniečnuju stancyju. Raniej ustalavali niekalki batarej na domiku administratara, pahladzieli i pierakanalisia, što za takimi technałohijami budučynia», — adznačyŭ Dźmitryj Sićko. Da kanca hoda na placoŭcy pa vulicy Višniavieckaj źjavicca bolš za 200 soniečnych batarej, u 2017 hodzie płanujecca ŭstanoŭka jašče 110 panelaŭ. Kompleks na dadzieny momant vypracoŭvaje 25-27 kVt.hadz, u budučyni jaho pradukcyjnaść składzie 50 kVt.hadz.
Užo siońnia soniečnaja enierhija całkam pakryvaje patreby aŭtastajanki. Da prykładu, domik administratara aciaplajecca pry dapamozie elektranahravalnika, enierhiju jakomu dajuć soniečnyja batarei. Častka enierhii dla vykarystańnia ŭ načny čas sutak nazapašvajecca ŭ akumulatarach, liški ž płanujecca realizoŭvać u ahulnuju sietku.
«Zrabili kroki i da enierhaefiektyŭnaści. Tak, naprykład, usie lampy aśviatleńnia, pražektary i lichtary na stajancy i myjcy — śviatłodyjodnyja. Atrymanaj ad sonca enierhii, jak pakazvajuć raźliki, chopić na toje, kab zakryć patreby aŭtamyjki ŭ elektryčnaści ŭ śvietły čas sutak», — adznačyŭ Dźmitryj Sićko. Pavodle jaho słoŭ, niahledziačy na toje, što aŭtamyjka samaabsłuhoŭvańnia zroblenaja pa typovym prajekcie, klijenty zmohuć adčuć karyść alternatyŭnaj enierhietyki za košt bolš nizkaha koštu pasłuhi.
Soniečnaja stancyja, jak čakajecca, stanie samaj bujnoj u Hrodna. «Pry ciapierašnich taryfach soniečnyja batarei akupiać siabie za 5-6 hadoŭ. Pryjemna, što naš prajekt padtrymali i miascovyja ŭłady. Mahčyma, budziem ukaraniać i inšyja technałohii, źviazanyja z alternatyŭnaj enierhietykaj», — raspavioŭ Dźmitryj Sićko.
