7 listapada ŭ Biełarusi śviatočny dzień — adznačajucca ŭhodki revalucyi (pa inšaj viersii — pieravarotu) ŭ rasijskim Pietrahradzie. Partyja balšavikoŭ na čale z Uładzimiram Uljanavym-Leninym zachapiła ŭładu ŭ rasijskaj stalicy, a ŭ vyniku hramadzianskaj vajny — i va ŭsioj Rasii.
Jeŭraradyjo pahartała biełaruskuju hazietu «Homan» («Homan»), jakaja ŭ toj čas vydavałasia ŭ Vilni dy padrabiazna aśviatlała padziei ŭ Pietrahradzie (Pieciarburhu). Na pačatku listapada 1917-ha vydańnie paviedamlała pra chvalavańni vajskoŭcaŭ u rasijskaj stalicy. A ŭ numary ad 9 listapada «Homan» źmiaščaje padborku navinaŭ. Ułady płanavali ŭzarvać u horadzie masty «miž rabočymi kvartałami i centram miesta (horada — Jeŭraradyjo)».
«Kieranski (premjer časovaha rasijskaha ŭradu — Jeŭraradyjo) skazaŭ, što balšaviki maniacca (źbirajucca — Jeŭraradyjo) zachapić u svaje ruki ŭłaść i vyzvać hramadskuju vajnu. Hetym jany adkryvajuć niemcam front», — pisaŭ «Homan». Jak viadoma, padziei ŭ Pietrahradzie adbyvalisia ŭ toj čas, kali praciahvałasia Pieršaja suśvietnaja vajna. Rasijska-niamiecki front prachodziŭ i praź Biełaruś.
Źviestki pra padziei ŭ Pietrahradzie vilenskaja redakcyja atrymlivała taksama sa Stakholma i Kapienhahiena. Sa stalicy Danii paviedamlali, što ŭ stalicy Rasii «ŭźniałasia hramadskaja vajna». «Šmat na jakich vulicach pabudavany barykady. Uźnialisia bitvy miž narodam i vojskam. U rabotnickich kvartałach panuje anarchija. Balšavicki ruch pašyrajecca. Rada ministraŭ pad maršałkoŭstvam (staršynstvam — Jeŭraradyjo) Kieranskaha zasiadała ŭsiu noč u Zimovym pałacy, navokał jakoha pastaŭleny harmaty», — čytajem u «Homanie».
Cikavaje paviedamleńnie pieradała ahienctva Reuters: «Atrad marskoj piachoty pad kamandaj kamitetu balšavikoŭ zaniaŭ hmach (budynak — Jeŭraradyjo) pieciarburhskaha telehrafnaha ahienctva, centralny telehraf, dziaržaŭny bank i marskoje ministerstva, dzie zasiadała rada respubliki, jakaja razyjšłasia».
U nastupnych numarach «Homan» taksama pisaŭ pra padziei ŭ Pieciarburhu, jak pra «revalucyju». Hałoŭnymi hierojami navinaŭ stali Lenin i Trocki.
