Kampanija «Budźma biełarusami!» i Sajuz biełaruskich piśmieńnikaŭ prapanavali skłaści śpis samych važnych knih, jakija za 500 hadoŭ paŭpłyvali na raźvićcio biełarusaŭ jak nacyi. Vyniki čytačoŭ i ekśpiertaŭ supali tolki častkova.
Narodnaje hałasavańnie ciahnułasia 10 dzion i składałasia ź niekalkich etapaŭ. Spačatku čytačy sajta «Budźma» skłali śpis najbolš važnych ź ich punktu hledžańnia knih, a paśla adbyłosia ŭłasna hałasavańnie pa hetym śpisie, składzienym supolna. Takim čynam źjaviŭsia top-20 knih, jakija pieramahli ŭ vyniku narodnaha hałasavańnia.
Pieršaje miesca zaniaŭ raman Uładzimira Karatkieviča «Kałasy pad siarpom tvaim». Na druhim miescy apynułasia «Biblija», jakuju vydaŭ Francysk Skaryna. Na trecim miescy — paetyčny zbornik Maksima Bahdanoviča «Vianok».
Ahulny vynik pieršaj dziasiatki atrymaŭsia nastupnym:
1. Uładzimir Karatkievič «Kałasy pad siarpom tvaim»
2. Francysk Skaryna, Biblija
3. Maksim Bahdanovič «Vianok»
4. Vasil Bykaŭ «Znak biady»
5. Jakub Kołas «Novaja ziamla»
6. Mikoła Husoŭski «Pieśnia pra zubra»
7. Ivan Mielež «Ludzi na bałocie»
8. Jan Barščeŭski «Šlachcic Zavalnia, abo Biełaruś u fantastyčnych apaviadańniach»
9. Statuty Vialikaha Kniastva Litoŭskaha
10. Adam Mickievič «Pan Tadevuš»
Litaraturny krytyk Cichan Čarniakievič tak prakamientavaŭ vyniki: «Hałasavańnie pakazała abličča aktyŭnaj i pasiŭnaj biełaruskamoŭnaj aŭdytoryi naohuł. Ja sačyŭ za tym, jak išła hałasavanka ad pačatku — Karatkievič vyjšaŭ u lidary amal adrazu, choć arhanizatary kampanii «Piacisothodnaść» navat nazvaj svajoju niedvuchsensoŭna ŭkazvali na Skarynu jak asnoŭnaha favaryta. Atrymałasia ž, što ŭ čytačoŭ svaja ijerarchija, niezaležnaja ad kampanij i prapanoŭ. Vybar «Kałasoŭ», «Vianka» i Skaryny tryma kitami biełaruskaj knihi pakazalny. Skaryna tut simvalizuje ŭsio našaje słaŭnaje minułaje časoŭ Reniesansu, Karatkievič — paŭstancki charaktar biełaruskaj paślavajennaj litaratury, a Bahdanovič akumuluje ŭ sabie ideju estetyzmu i čystaj krasy (zabirajučy takim čynam bały ŭ Duboŭki, Žyłki, Kaluhi i inšych intelektuałaŭ)».
Asobna prajšło hałasavańnie siarod ekśpiertaŭ. Na prośbu arhanizataraŭ u skład ekśpiertnaj rady ŭvajšło bolš za dva dziasiatki asobaŭ, siarod jakich viadomyja piśmieńniki, fiłosafy, krytyki, niezaležnyja vydaŭcy, a taksama pradstaŭniki dziaržaŭnych archivaŭ i muziejaŭ (siarod ich fiłosaf Valancin Akudovič, brytanski daśledčyk Arnold Makmilin, dyrektar archiva-muzieja litaratury i mastactva Hanna Zapartyka). Kožny z ekśpiertaŭ prapanavaŭ svoj śpis z 50 knih. A ź jaho sfarmavali ahulny śpis pa kolkaści zhadak kožnaj pazicyi. Pieršyja try miescy padzialili «Dudka biełaruskaja» Franciška Bahuševiča, «Vianok» Maksima Bahdanoviča i «Biblija» Francyska Skaryny.
Pieršaja dziasiatka pa viersii ekśpiertaŭ atrymałasia nastupnaj:
1. Francišak Bahuševič «Dudka biełaruskaja»
2. Maksim Bahdanovič «Vianok»
3. Francysk Skaryna, Biblija
4. Jakub Kołas «Novaja ziamla»
5. Mikoła Husoŭski «Pieśnia pra zubra»
6. Jan Barščeŭski «Šlachcic Zavalnia»
7. Uładzimir Karatkievič «Kałasy pad siarpom tvaim»
8. Ivan Mielež «Ludzi na bałocie»
9. Jaŭchim Karski «Biełarusy»
10. Statut Vialikaha Kniastva Litoŭskaha
Jak bačna, «Kałasy pad siarpom tvaim», lidar narodnaha hałasavańnia, akazalisia tut na siomym miescy.
