Sindza Abe. Fota Reuters / David Mareuil
«Čatyry vyspy źjaŭlajucca nieadjemnaj častkaj terytoryi našaj krainy. My pieradali pa dypłamatyčnych kanałach, što heta […] niesumiaščalna z pazicyjaj našaj krainy i vyklikaje škadavańnie», — cytuje Abe Reuters.
Pra toje, što Rasija raźmiaściła najnoŭšyja bierahavyja rakietnyja kompleksy «Bastyjon» i «Bał» na Paŭdniovych Kuryłach, stała viadoma 22 listapada.
Kompleks «Bastyjon» byŭ raźmieščany na vostravie Iturup, a kompleks «Bał» — na vostravie Kunašyr, nahadvaje Bi-bi-si. Abiedźvie vyspy ŭvachodziać u hrupu Kurylskaj hrady, ich terytaryjalnuju prynaležnaść asprečvaje Japonija.
Jak paviedamili ŭ Kramli, raźmiaščeńnie rakiet nie pavinna paŭpłyvać na «centraimklivyja tendencyi» ŭ adnosinach z Tokia.
Prezidenta Rasii Uładzimira Pucina čakajuć ź vizitam u Japoniju ŭ siaredzinie śniežnia.
A na pačatku vieraśnia Pucin dapuściŭ kampramis ź Japonijaj nakont Kuryłaŭ.
«Havorka nie idzie pra niejki abmien, pra niejkija prodažy, havorka idzie ab pošuku vyrašeńnia, pry jakim nivodny z bakoŭ nie budzie adčuvać siabie ni pieramožanym, ni prajhraŭšym», — skazaŭ tady Pucin.
U čaćvier aficyjny pradstaŭnica MZS Rasii Maryja Zacharava zajaviła, što metaj razhortvańnia rakiet źjaŭlajecca ŭmacavańnie nacyjanalnaj biaśpieki «na płanavaj asnovie».
«Paŭdniovyja Kuryły źjaŭlajucca nieadjemnaj častkaj rasijskaj terytoryi», — dadała pradstaŭnik MZS.
Paśla Druhoj Suśvietnaj vajny vyspy Iturup, Kunašyr, Šykatan i hrupa astravoŭ Chabamai ŭvajšli ŭ skład SSSR. Japonija ličyć, što heta adbyłosia niezakonna, i sprabuje viarnuć vyspy.
Rasija miarkuje, što ŭ Japonii niama pryčyn asprečvać prynaležnaść vyspaŭ.
Praz hety kanflikt krainy da hetaha času nie padpisali mirnaje pahadnieńnie paśla zakančeńnia Druhoj suśvietnaj vajny.