Usim, chto pražyvaje na terytoryi Sińcziana, nastojliva rekamiendavana zdać pašparty ŭ palicyju, dzie jany buduć «zachoŭvacca ŭ biaśpiecy». Takaja ž sistema ŭžo dziejničaje ŭ Tybiecie.
Dziaržaŭnyja ŚMI Kitaja tłumačać pryniatuju abmiežavalnuju mieru nieabchodnaściu «padtrymlivać sacyjalny paradak» i zmahacca z teraryzmam.
Takim čynam, kožny, chto pražyvaje ŭ hetym pieravažna musulmanskim rehijonie Kitaja, pavinien budzie paviedamić u palicyju pra svoj namier pajechać kudy-niebudź, kab jamu vydali dakumienty.
Pravaabarončaja arhanizacyja Human Rights Watch nazvała hetaje rašeńnie miascovych uładaŭ parušeńniem nieadjemnaha čałaviečaha prava na svabodu pierasoŭvańnia.
Sińczian, dzie pražyvaje bolš za 10 miljonaŭ musulman-ujhuraŭ — samy niestabilny rehijon KNR. Ujhurskija sieparatysty daŭno viaduć baraćbu za stvareńnie niezaležnaj dziaržavy Uschodni Turkiestan, niaredka vykarystoŭvajučy hvałtoŭnyja mietady.
Pravaabarončyja arhanizacyi ŭskładajuć adkaznaść za kryvavaje supraćstajańnie i na Piekin, abvinavačvajučy kitajskija ŭłady ŭ masavych aryštach ujhuraŭ i abmiežavańni ich kulturnych i relihijnych pravoŭ.
