Fota: last-lex, skyscrapercity.com
20 lutaha ŭ Minsku adbudziecca aŭkcyjon pa prodažy niekalkich staradaŭnich budynkaŭ byłoha brovaha, jakija znachodziacca pobač z Łošyckim siadzibna-parkavym kompleksam. Tarhi pravodziacca z abaviazkovaj umovaj: budučamu inviestaru nieabchodna rekanstrujavać niekalki pabudoŭ kanca XIX stahodździa pad haściničny kompleks katehoryi 4 zorki, paviedamlaje onliner.by.
Prajekt haściničnaha kompleksu na vulicy Čyžeŭskich źjaŭlaŭsia ŭ ŚMI jašče ŭ 2010 hodzie. Tady płanavałasia złučyć novymi prybudovami staryja budynki z zachavańniem architekturnych detalaŭ.
U kompleksie było praduhledžana 150 numaroŭ, pakoi pieramoŭ, SPA i fitnies-centr z basiejnam, sałon pryhažości, bankietnaja zała, pivavarny cech ź piŭnym restaranam. Zamoŭcam abjekta vystupiła pradpryjemstva «Biznes-centr «Stalica»», jakomu naležyć hatel «Viktoryja» na praśpiekcie Pieramožcaŭ. Budaŭnictva płanavałasia pačać u 2011 hodzie, adnak inviestar tak i nie byŭ znojdzieny. Ciapier, mabyć, pradpryjemstva vyrašyła pazbavicca ad ciažkaj nieruchomaści.
Pry najaŭnaści ŭdzielnikaŭ aŭkcyjonu tarhi pačnucca z 27 708 309 710 rubloŭ (3,2 młn dalaraŭ). Nieruchomaja majomaść aceniena pry hetym u 21,7 miljarda rubloŭ, a pačatkovaja cana prava zaklučeńnia damovy arendy ziamielnaha nadzieła składaje 6 młrd rubloŭ.
«U suviazi z tym, što budynki pa vuł. Čyžeŭskich, 17, prajezd Čyžeŭskich, 5 i prajezd Čyžeŭskich, 6 źjaŭlajucca pomnikami horadabudaŭnictva i architektury i adnosiacca da nieruchomaj i historyka-kulturnaj kaštoŭnaści, usia dziejnaść pieramožcy aŭkcyjonu pavinna pravodzicca ŭ adpaviednaści z patrabavańniami Zakona Respubliki Biełaruś «Ab achovie historyka-kulturnaj spadčyny Respubliki Biełaruś»», — paviedamlajecca va ŭmovach praviadzieńnia aŭkcyjonu na sajcie Minharvykankama.
