Kijeŭskija palicyjanty znajšli kvateru z rečami ukrainskaha premjera-ŭciekača Mikałaja Azarava. Pra heta paviedamlaje vykonvajučy abaviazki kiraŭnika Nacyjanalnaj palicyi Vadzim Trajan u fejsbuku, piša «UP».
Tut i nižej fota z fejsbuka Vadzima Trajana
«Kvatera-skład, nabitaja haspadarčymi torbami z kaštoŭnymi rečami i tvorami mastactva, znachodziłasia ŭ Darnickim rajonie stalicy», — udakładniŭ Trajan.
Pa słovach Trajana, palicyjanty natyknulisia na jaje «padčas adpracoŭki» i, atrymaŭšy ŭsie dazvolnyja dakumienty, apieratyŭniki razam z advakatam zajšli ŭ kvateru.
«Dziasiatki abrazoŭ i relihijnych knih, datavanych 19 stahodździem, aryhinały (zhodna z vysnovami ekśpiertaŭ) tvoraŭ žyvapisu Illi Repina, Vasila Trapinina i Nikasa Safronava. A jašče stałovaje srebra, pamiatnyja maniety, uznaharodnaja zbroja z dazvołami na imia «premjera-ŭciekača» i navat kazackaja šabla», — pieraličvaje Trajan znojdzienaje.
«Taksama ŭ kvatery byli znojdzienyja ŭznaharody i vinšavańni ad kiraŭnictva RF, jakija palitemihrant-niaŭdačnik atrymlivaŭ navat padčas trahičnych padziej Revalucyi Hodnaści», — dadaje jon.
Pavodle papiaredniaj infarmacyi, košt znachodki aceńvajecca ŭ niekalki miljonaŭ dalaraŭ ZŠA, udakładniŭ kiraŭnik vobłaści.
Mikałaj Azaraŭ jak paplečnik Viktara Janukoviča byŭ premjer-ministram Ukrainy z 11 sakavika 2010 hoda pa 28 studzienia 2014 hoda, a taksama pieršym vice-premjeram i ministram finansaŭ u pieršym i druhim uradach Janukoviča, jašče raniej uznačalvaŭ Padatkovuju administracyju.
Paśla Majdana 2013-2014 hoda Azaraŭ uciok z Ukrainy. Z 3 červienia 2014 hoda jon znachodzicca ŭ vyšuku Słužby biaśpieki Ukrainy.
