U aŭtorak Brescki abłasny sud vynies prysud žycharu Sankt-Pieciarburha, jaki ciaham 20 hadoŭ hvałtavaŭ biełarusak, paviedamlaje BIEŁTA. Paciarpiełymi ad mańjaka pryznanyja 35 čałaviek, ź ich pra 11 stała viadoma tolki padčas rasśledavańnia.
Fota Śledčaha kamiteta
Mužčyna pryznany vinavatym u zhvałtavańni, hvałtoŭnych dziejańniach seksualnaha charaktaru, u tym liku učynienych paŭtorna.
Nahadajem, u listapadzie minułaha hoda za ździajśnieńnie sieryi zhvałtavańniaŭ na terytoryi Biełarusi milicyja zatrymała 45-hadovaha hramadzianina Rasii, žychara Sankt-Pieciarburha. Mužčyna, jak vyśvietliłasia, pieryjadyčna pryjazdžaŭ u Biełaruś naviedvać svajakoŭ, jakija pražyvajuć u Bresckaj vobłaści.
Z 1994 pa 2014 hod padčas hetych vizitaŭ jon hvałtavaŭ žančyn.
Złačynstvy ździajśniaŭ pablizu prypynkaŭ čyhunačnaha i aŭtatranspartu. U šerahu vypadkaŭ abvinavačvany taksama zabiraŭ u achviar hrošy i kaštoŭnyja rečy. Zhvałtavańni supravadžalisia pahrozami fizičnaj raspravy, časam dla hetaha jon vykarystoŭvaŭ nož. Sam fihurant paźniej pryznaŭsia, što zhvałciŭ paradku 100 žančyn.
- Asnoŭnaja častka epizodaŭ źjaŭlajecca padziejami bolš čym dziesiacihadovaj daŭniny, - u kastryčniku paviedamiła pres-słužba Śledčaha kamiteta Biełarusi. - Asablivuju składanaść mieŭ toj fakt, što mnohija achviary złačynstvaŭ nie žadali kazać pra heta, a niekatoryja i zusim pieršapačatkova admaŭlali fakt zhvałtavańnia, kab nie ŭspaminać balučyja situacyi.
Doŭhi čas złoŭ mierkavanaha hvałtaŭnika ŭskładniaŭ toj fakt, što paśla ździajśnieńnia złačynstvaŭ jon adjazdžaŭ ź Biełarusi. A byvaŭ tut u asnoŭnym 1-2 razy na hod.
