Sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec u čarhovy raz aštrafavany za ŭdzieł u šmatdzionnaj akcyi salidarnaści z błohieram Eduardam Palčysam na 50 bazavych vieličyń (1.050 rubloŭ).
Jak paviedamiŭ palityk BiełaPAN, takoje rašeńnie było pryniataje adnym z rajonnych sudoŭ Minska 6 śniežnia, adnak kopiju rašeńnia jon atrymaŭ pa pošcie tolki ciapier.
Akcyja ŭ padtrymku stvaralnika błoha 1863x.com Eduarda Palčysa la ścien Minharsuda, dzie razhladałasia kryminalnaja sprava ŭ dačynieńni da jaho, pačałasia 14 kastryčnika i adnaŭlałasia štodnia da 24 kastryčnika ŭ tyja dni, pakul išoŭ praces u zakrytym režymie. 28 kastryčnika Palčys byŭ pryznany vinavatym u raspalvańni varožaści pa prykmiecie rasavaj, nacyjanalnaj, relihijnaj, moŭnaj ci inšaj sacyjalnaj prynaležnaści, a taksama ŭ vyrabie i raspaŭsiudzie parnahrafičnych materyjałaŭ i pryhavorany da adnaho hoda dzieviaci miesiacaŭ abmiežavańnia voli biez nakiravańnia ŭ papraŭčuju ŭstanovu. Jon byŭ vyzvaleny ŭ zale suda.
Raniej Sieviaryniec byŭ užo trojčy aštrafavany pa pratakołach, składzienych padčas praciahłaj akcyi. Takim čynam, suma štrafaŭ, vyniesienych za ŭdzieł u pikiecie ŭ padtrymku Palčysa, składaje 4.200 rubloŭ.
«Heta ŭžo piatnaccaty moj štraf za hod. Ahulnaja suma štrafaŭ — 14.280 rubloŭ», — paviedamiŭ palityk, nie ŭdakładniŭšy, jakaja častka ź ich apłačanaja.
Pavodle słoŭ Sieviarynca, pavinny adbycca sudy jašče minimum pa dvuch pratakołach, składzienych u dačynieńni da jaho za ŭdzieł u niesankcyjanavanych akcyjach. «Milicyjaniery ŭžo navat da mianie nie padychodziać, a składajuć pratakoły potym zavočna», — adznačyŭ sustaršynia arhkamiteta BCHD.