U redakcyju «Našaj Nivy», a taksama šerahu biełarusaŭ 3 studzienia pryjšli listy nibyta ad pradziusiera prahramy «Viečar z Uładzimiram Sałaŭjovym» na telekanale «Rośsija». Adnak televiadoŭca zajaviŭ u tvitary, što takaja prahrama nie rychtujecca.
U listach, jakija atrymali niekatoryja ŚMI, a taksama palitołahi i žurnalisty, havaryłasia, što 11 studzienia płanujecca efir pra Biełaruś, temaj jakoha stanie kandydatura ŭ pierajemniki Łukašenki. «Chto zamienić Łukašenku», — tak i napisana.
Zajaŭlałasia, što havorka pojdzie pra «palityčnuju i ekanamičnuju situacyju ŭ krainie, adnosinach z Rasijaj i ES, aryšty prychilnikaŭ ruskaha śvietu, źnikłych palitykach i padručnikach historyi».
U Redakcyi NN prasili «kantakty pavažanych biełaruskich historykaŭ» i padkreślivali, što siarod udzielnikaŭ buduć były hienieralny prakuror Biełarusi Aleh Bažełka, a taksama Natalla Radzina, Arsień Sivicki, Stanisłaŭ Šuškievič, Alaksandr Zimoŭski.
Z rasijskaha boku abiacaŭsia ŭdzieł Franca Klinceviča, Uładzimira Žyrynoŭskaha, Prachanava, Suzdalcava.
Natalla Radzina napisała ŭ siabie ŭ FB, što jana admaŭlajecca jechać u Rasiju, ale hatovaja zapisacca z Varšavy praz skajp, a Sivicki skazaŭ «Našaj Nivie», što paśla zapisu na telekanale «Źviezda», kali ź jaho vialikaj pramovy pakinuli 30 siekund, jechać na jašče adzin zapis ličyć duraściu.
Zadać arhanizataram prahramy ŭdakładniajučyja pytańni nam nie ŭdałosia — telefon, paznačany ŭ liście, jak akazałasia, naležyć nie pradziusaru prahramy.
A praź niekalki hadzin sam Uładzimir Sałaŭjoŭ napisaŭ u siabie ŭ tvitary, što nijakaj prahramy zdymać nie źbirajecca.
Što da źmiestu fejkavaha zapytu, to były kiraŭnik Biełteleradyjokampanii Alaksandr Zimoŭski adznačyŭ «Našaj Nivie», što «nivodzin rasijski pradziusar słova prezident ź vialikaj litary pisać nie budzie».
Listy rassyłalisia ad imia Aleny Sałominaj z mejła [email protected].
Fejkavaje zaprašeńnie moža mieć svaim nastupstvam toje, što biełaruskija ekśpierty ź jašče bolšym niedavieram buduć stavicca da zaprašeńniaŭ u efir rasijskich ŚMI.