Za minuły hod terminovyja ŭkłady nasielnictva Biełarusi ŭ zamiežnaj valucie skaracilisia na 9% i apuścilisia da minimalnaha z 2014 hoda ŭzroŭniu.
Jak śviedčać dadzienyja bankaŭskaj statystyki, pa stanie na 1 studzienia 2017 hoda terminovyja valutnyja ŭkłady nasielnictva skłali 6 młrd 998,9 młn dołaraŭ. Za hod jany skaracilisia amal na 700 młn dołaraŭ (na pačatak 2016 hoda depazity fizičnych asob u zamiežnaj valucie składali kala 7,7 młrd dołaraŭ).
Terminovyja rublovyja ŭkłady nasielnictva ŭ 2016 hodzie pavialičylisia (z ulikam naličanych pracentaŭ) na 12% i dasiahnuli 2,95 młrd rubloŭ. Pry hetym varta adznačyć, što siaredniaja staŭka pa rublovych depazitach fizičnych asob u minułym hodzie skłała 18,3% (z terminam raźmiaščeńnia srodkaŭ da hoda) i 21,4% (pry ŭmovie raźmiaščeńnia srodkaŭ bolš za hod). Takim čynam, biez uliku naličanych pracentaŭ u minułym hodzie adbyłosia źnižeńnie i rublovych depazitaŭ fizičnych asob.
Pamianšeńnie ŭkładaŭ nasielnictva ekanamisty tłumačać hałoŭnym čynam tym, što realnyja dachody hramadzian u minułym hodzie praciahvali skaračacca.
«Tendencyja źnižeńnia źbieražeńniaŭ, mabyć, zachavajecca. Realnyja dachody nasielnictva ŭ minułym hodzie znoŭ źmienšylisia, i, kab padtrymać spažyvańnie na raniejšym uzroŭni (a žadańnie takoje ŭ nasielnictva prasočvajecca), u chod iduć źbieražeńni», — adznačyŭ u razmovie z karespandentam BiełaPAN navukovy supracoŭnik biełaruskaha ekanamičnaha daśledča-adukacyjnaha centra (BEROC) Dźmitryj Kruk.
U najbližejšy čas rostu dachodaŭ nasielnictva nie pradbačycca, miarkuje akademičny dyrektar BEROC Kaciaryna Barnukova. Reakcyja nasielnictva na hetu situacyju moža być dvajakaj, ličyć jana. Z adnaho boku, chatnija haspadarki sprabujuć za košt źbieražeńniaŭ padtrymlivać uzrovień spažyvańnia na dakryzisnym uzroŭni. «Adnak kali nasielnictva kančatkova ŭśviadomić, što na rost zarobkaŭ raźličvać u najbližejšyja hady nie treba, mahčyma, chatnija haspadarki pierahledziać svaje pavodziny i źniziać spažyvańnie, što stabilizuje ŭzrovień źbieražeńniaŭ», — vykazała mierkavańnie Barnukova.
Pavodle jaje słoŭ, statystyka valutnaha rynku śviedčyć ab tym, što abjom zamiežnaj valuty, jakuju nasielnictva na čystaj asnovie pradaje ŭ bankach, u apošnija miesiacy staŭ źnižacca. «Vierahodna, hramadzianie pasprabujuć zbałansavać svaje dachody i raschody, i tamu ŭžo ŭ 2017 hodzie abjomy čystaha prodažu valuty z boku nasielnictva mohuć być nižejšyja, čym ŭ 2016 hodzie», — prahnazuje analityk.
Jak paviedamlałasia raniej, nasielnictva na najaŭnym rynku ŭ 2016 hodzie pradało zamiežnaj valuty na 2,4 młrd dołaraŭ bolš, čym kupiła. Nacyjanalny bank raniej tłumačyŭ zališniuju prapanovu valuty z boku nasielnictva tym, što jano za košt prodažu valutnych źbieražeńniaŭ sprabuje padtrymlivać spažyvańnie na dakryzisnym uzroŭni.
