Biełaruś i Jehipiet damovilisia pašyrać źniešniehandlovyja intaresy adno adnaho ŭ ekanamičnych abjadnańniach krain, členami jakich źjaŭlajucca. Pra heta havorycca ŭ sumiesnaj dekłaracyi Alaksandra Łukašenki i prezidenta Jehipta Abdel Fatacha al-Sisi, jakuju lidary dziaržaŭ padpisali 15 studzienia pa vynikach pieramoŭ.
Uličvajučy ahulnaje imknieńnie da ŭmacavańnia biełaruska-jehipieckich adnosin, baki pryniali rašeńnie ab pahłybleńni ŭzajemavyhadnaha supracoŭnictva. U pryvatnaści, krainy zhadzilisia sumiesna pracavać nad zaklučeńniem Pahadnieńnia ab svabodnym handli pamiž Jeŭrazijskim ekanamičnym sajuzam i jaho dziaržavami-členami z adnaho boku i Jehiptam ź inšaha boku.
«Baki buduć akazvać mahčymuju padtrymku ŭ pašyreńni źniešniehandlovych intaresaŭ adzin adnaho ŭ ekanamičnych abjadnańniach krain, členami jakich źjaŭlajucca Biełaruś i Jehipiet», — havorycca ŭ dekłaracyi.
Kiraŭniki dziaržaŭ syšlisia na dumcy, što ekanamičnaje supracoŭnictva ŭjaŭlaje saboj ruchajučuju siłu biełaruska-jehipieckich adnosin. Tamu baki hatovy pry zachavańni rynačnych pravił pašyrać handal kankurentazdolnymi tavarami, sumiesna spraščać umovy ŭzajemnaha handlu, sadziejničajučy zbałansavanamu rostu jaho abjomu.
Akramia taho, Jehipiet stanoŭča razhledzieŭ imknieńnie Biełarusi atrymać status nahladalnika ŭ Arhanizacyi isłamskaha supracoŭnictva.
