Centr palityčnych i zamiežnapalityčnych daśledavańniaŭ u pačatku hetaha hoda apublikavaŭ novy dakład ab biełaruska-rasijskich adnosinach. Jon maje nazvu «Adnabakovyja dziejańni Rasijskaj Fiederacyi ŭ adnosinach Respubliki Biełaruś u 2017 hodzie».
Aŭtarami vystupili kiraŭniki Centra Arsień Sivicki i Juryj Caryk. Papiaredni ich dakład «Biełaruś u kantekście supraćstajańnia Rasija—NATA» narabiŭ šmat šumu ŭ rasijskaj miedyjaprastory, a aŭtaraŭ stali abvinavačvać u rusafobii i pahražać turmoj.
Novy dakład nie mienš rezki ŭ svaich acenkach. U samym pačatku ekśpierty staviać pytańnie, što ciaham pieršych dziesiaci miesiacaŭ 2017 hoda Rasija pasprabuje zabiaśpiečyć poŭny vajskova-palityčny kantrol nad Biełaruśsiu.
«U ciapierašni čas biełaruska-rasiejskija adnosiny charaktaryzujucca poŭnamaštabnym kompleksnym kryzisam, jaki ŭklučaje jak roznahałośsi pa kankretnych pytańniach ekanamičnaha źmiestu, tak i supiarečnaści pa fundamientalnych pytańniach stratehičnaha i vajskova-palityčnaha charaktaru», — ličać Sivicki i Caryk.
Siarod najvastrejšych pytańniaŭ biełaruska-rasijskich adnosin aŭtary nazyvajuć: 1) Cisk na Biełaruś z metaj raźmiaščeńnia na terytoryi krainy rasijskich vojskaŭ na pastajannaj asnovie. 2) Niaŭzhodnieny ź biełaruskim bokam płan pa adpraŭcy ŭ Biełaruś 4162 vahonaŭ z vajskovymi hruzami.
3) Niazhoda biełaruskaha boku na apłatu rasijskaha hazu pa kantraktnaj canie ŭ suviazi z rezkim źnižeńniem cenaŭ na suśvietnyja enierhanośbity ŭ paraŭnańni z uzroŭniem, zafiksavanym u kantrakcie, a taksama šerah inšych punktaŭ.
«Va ŭmovach kompleksnaha kryzisu biełaruska-rasijskich adnosin, a taksama ŭličvajučy chod raźvićcia mižnarodnaj situacyi i rasijskaj ŭnutranaj palityki, rasijski bok atrymlivaje ŭsio bolš stymułaŭ dla vyrašeńnia situacyi, jakaja składvajecca, u adnabakovym paradku.
Takoje rašeńnie situacyi składajecca ŭ zabieśpiačeńni poŭnaha vajskova-palityčnaha kantrolu rasijskaha boku nad Respublikaj Biełaruś u adnabakovym paradku, budź to ŭ vyniku źmieny režymu abo prymianieńnia krajnich formaŭ cisku na ciapier dziejučaje kiraŭnictva Respubliki Biełaruś», — miarkujuć analityki.
Faktyčna padymajecca pytańnie, što sioleta Rasija moža pasprabavać skinuć Alaksandra Łukašenku i na jaho miesca pryvieści bolš łajalnaha dla siabie kiraŭnika.
«Z boku rasijskaj hramadskaj dumki lehitymnaść moža być zabiaśpiečana ŭ ramkach dvuch typaŭ naratyvaŭ. Naratyŭ pieršaha typu moža być u tym, što dziejučaje kiraŭnictva Respubliki Biełaruś nibyta stała achviaraj vystupleńniaŭ «prazachodniaj nacyjanalistyčnaj apazycyi», a Rasijskaja Fiederacyja, umiešvajučysia ŭ situacyju, «sadziejničaje adnaŭleńniu zakonnaj ułady i kanstytucyjnaha paradku».
Naratyŭ druhoha typu moža być u tym, što dziejučaje kiraŭnictva Respubliki Biełaruś samo adviarnułasia ad Rasii i stała sajuźnikam Zachadu suprać Maskvy. U takim vypadku Rasijskaja Fiederacyja budzie prosta abaraniać svaje nacyjanalnyja intaresy», — miarkujuć ekśpierty.
«Rasijski bok rezka aktyvizavaŭ pracu z ultrapravymi elemientami ŭ Biełarusi. Hetamu spryjaje ŭ tym liku supiarečlivaja palityka biełaruskich siłavych viedamstvaŭ u dačynieńni da fanackich hrupovak», — pišuć Sivicki i Caryk pra instrumientaryj rasijskaha boku ŭ vykanańni svajho płana.
Jašče adnoj ź pieravah rasijskaha boku nazyvajecca praca sa śpiecsłužbami. «Dadzienaja pieravaha składajecca jak u bolš vysokim uzroŭni resursnaj zabiaśpiečanaści, kadravym patencyjale adpaviednych rasijskich viedamstvaŭ (da ich ź niadaŭnich časoŭ dadałasia taksama Rashvardyja, u struktury jakoj stvorana ułasnaja raźviedka), tak i ŭ ich zdolnaści ŭpłyvać na pracu biełaruskich kontrahientaŭ pa aficyjnych kanałach i nieaficyjna».
«Zdolnaść karektna supraćstajać cisku Maskvy, adstojvajučy ŭłasnyja pazicyi, ale nie pierachodziačy da kanfrantacyi z Rasijaj, ujaŭlaje saboj hałoŭnuju zadaču, jakaja staić na dadzienym etapie pierad Respublikaj Biełaruś. U vypadku, kali Biełarusi atrymajecca vyrašyć dadzienuju zadaču i praduchilić pierachod apisanaj pahrozy z boku Rasijskaj Fiederacyi ŭ realny ŭnutrany kanflikt, z čaćviortaha kvartała 2017 hoda mižnarodnaja abstanoŭka moža źmianicca da lepšaha i adkryć mahčymaść dla novaha pryncypovaha i adkrytaha abmierkavańnia biełaruska-rasijskich adnosin», — robiać vysnovu analityki.
