Kinastudyja nabyła sučasny telekinadatčyk DIXI SD kampanii CTM Debrie, kab pierakładać kinavyjavu z pazytyŭnych i niehatyŭnych kinastužak u videafarmat. Hety telesin maje systemy dla sčytvańnia key‑kodu, analahavych i ličbavych (Dolby) fanahramaŭ, a taksama dla paplanavaj karekcyi koleru. Što heta značyć?
Prostymi słovami, heta značyć, što kali abstalavańnie pastupić na kinastudyju, biełaruskija stužki narešcie možna budzie pabačyć na DVD.
Zaraz, kab paznajomicca z klasykaj biełaruskaha kiniematohrafu, hledaču nieabchodna sačyć za prahramaj TV, albo iści ŭ Muzej kino, dzie niebahata pradstaŭlena navat filmaŭ niamoha pieryjadu, jakich ,było vypuščana nia tak užo j mnoha.
Što ŭžo kazać pra dostup u archiŭ kinafotafonadakumentaŭ — dla šyrokaj hramadzkaści jon, viadoma, začynieny.
Sa źjaŭleńniem na kinastudyi novaj techniki, isnujuć plany pa stvareńni pradpryjemstva dla vypusku kinapradukcyi na ličbavych nośbitach — pryčym, licenzyjnaj — a vypusk biełaruskaj pradukcyi budzie mieć niekatory pryjarytet.
Novaŭvodziny ŭ praktycy kinastudyi adbyvajucca jak častka jaje rekanstrukcyi; jašče napačatku hoda paviedamlałasia, što na rekanstrukcyju planujecca asvoić bolš za 45 miljonaŭ dalaraŭ ZŠA.
Aparatura dla pierahonki stužak u ličbu moža pastupić užo ŭ lipieni. A praz kolki miesiacaŭ my, mahčyma, nabudziem dla kalekcyi pieršyja biełaruskija filmy — «Lasnuju byl» (1926) i «Prastytutku» (1927).
I ŭsio ž, isnuje mierkavańnie, što technalohija budzie vykarystoŭvacca vyklučna ŭ kamercyjnych patrebach — dla raspaŭsiudu na DVD sučasnych stužak «Biełaruśfilmu», vytvorčaść jakich maje tendencyju da pavieličeńnia na dźvie ŭ hod.
Tamu nia vyklučana, što ŭ pieršuju čarhu vypuściać filmy hetaha (10 stužak) i nastupnaha hadoŭ. Klasyka patrapić u kožny dom paśla sučasnych šedeŭraŭ.
 |
 |
