U ekanomicy Biełarusi ŭ śniežni 2016 hoda było zaniata 4 młn 381,3 tys. čałaviek, paviedamiŭ Nacyjanalny statystyčny kamitet. U śniežni 2015 hoda — 4 młn 470 tys. čałaviek. Takim čynam za hod zaniatych stała mienš na 88,7 tys.
Kolkaść zarehistravanych biespracoŭnych na kaniec 2016 hoda skłała 35,3 tys. čałaviek (na kaniec 2015 hoda — 24,22 tys.). Uzrovień zarehistravanaha biespracoŭja skłaŭ 0,8% ekanamična aktyŭnaha nasielnictva (0,5%).
Alaksandr Łukašenka ŭ štohadovym pasłańni da naroda i parłamienta 21 krasavika 2016 hoda zajaviŭ pra nieabchodnaść «źviarnuć uvahu na efiektyŭnuju zaniataść ludziej, i tut nie abyścisia biez aptymizacyi kolkaści rabotnikaŭ». «Na kožnaje skaročanaje miesca pavinna być stvorana novaje, vysokapradukcyjnaje, — skazaŭ jon. — Kali raptam na MAZie, BiełAZie adbyvajecca aptymizacyja i vyzvalajecca ennaja kolkaść rabotnikaŭ, hetych ludziej pavinny pieravieści za ruku praz darohu i pracaŭładkavać na novym pracoŭnym miescy, a nie vykidać na vulicu. Patrabavańnie za heta budzie ŭ hetym hodzie žorstkim».
Łukašenka nahadaŭ pra zadańnie ŭradu i staršyniam abłvykankamaŭ stvaryć u 2016 hodzie 50 tys. novych pracoŭnych miescaŭ. «Heta minimalnaje patrabavańnie. Usiaho tolki 50 tys., navat nie 100 tys. i nie miljon pracoŭnych miescaŭ. A kab stvaryć miljon pracoŭnych miescaŭ, treba mieć miljard! My realisty, staim na ziamli: nam treba 50 tys. pracoŭnych miescaŭ. Kožnamu zadańnie daviedziena, vykonvajcie», — zajaviŭ kiraŭnik dziaržavy. Pry hetym jon papiaredziŭ, što «miescy stvarajucca nie dla spravazdač, a dla kankretnych ludziej, jakija žyvuć na ziamli».
