Fota maz.by
Aŭtobus ad MAZa — pieršy školny transpart u SND, jaki ad pačatku raspracoŭvaŭsia dla viaskovaj miascovaści. U adroźnieńnie ad standartnych «školnikaŭ», stvoranych na asnovie isnujučych madelaŭ, MAZ-257.S30 prajektavali z nula. Novy śpiecaŭtobus bolš mahutny i sprytniejšy, čym jaho «braty».
Školny aŭtobus atrymaŭ ramnaje šasi ad siarednietanažnaha hruzavika. Vysoki klirans i resornaja padvieska dazvalajuć svabodna jeździć pa hruntavych darohach. Školny śpiecaŭtobus abstalavany sučasnym ruchavikom ekałahičnaha kłasa Jeŭra-5. Dla bolšaj nadziejnaści ŭbudavanaja sistema abmiežavańnia chutkaści, jakaja nie dazvolić razahnać transpart zvyš 60 km/h.
Śpiecaŭtobus taksama atrymaŭ padoŭžany sałon na 28 pasažyraŭ. Unutranaja prastora padzielena na miescy dla nastaŭnikaŭ i školnikaŭ, pryčym siadzieńni dla dziaciej asnaščanyja čatyrochkropkavymi ramianiami biaśpieki. Nad kresłami arhanizavanyja bahažnyja palicy dla školnych zaplečnikaŭ, a dla pieršakłaśnikaŭ praduhledžanaja vysoŭnaja dadatkovaja prystupka. Inžyniery taksama ŭstalavali ŭ aŭtobusie źniešniuju hučnuju suviaź i multymiedyjnyja sistemy, kab možna było paciešyć dziaciej u darozie.
«Školnik» paśpiachova prajšoŭ vyprabavańni, padčas jakich pravieryli nadziejnaść kanstrukcyj. Testy pakazali, što madel adpaviadaje ŭsim patrabavańniam biaśpieki, pryniatym u krainach SND i Jeŭropy.
«Novaja madel ŭziała najlepšaje ad hruzavika i aŭtobusa: z adnaho boku, padvyšanaja prachodnaść, z druhoha — kamfortnyja ŭmovy i maksimalnaja biaśpieka dla dziaciej. Aŭtobus pryznačany dla taho, kab pryvieźci školnikaŭ u škołu ź luboj vioski ci chutara, niezaležna ad jakaści darožnaha pakryćcia. Heta robić transpart niezamiennym amal u lubym rehijonie», — adznačyli raspracoŭščyki.
Pieršyja aŭtobusy źjaviacca na viaskovych darohach vosieńniu. Ich taksama płanujuć pastaŭlać na rynki krain JEAES.
«Śpiecaŭtobusami cikaviacca mnohija patencyjnyja zamoŭcy. Pa sutnaści, my stvaryli aŭtobus, jaki nie maje anałahaŭ u svaim kłasie. My čakajem, što novaja madel budzie paśpiachovaja na zamiežnych rynkach», — ličać u AAT «MAZ».
Śpiecaŭtobus stvorany pa prahramie «Školny aŭtobus», jakaja ažyćciaŭlajecca AAT «MAZ» i Bankam raźvićcia Respubliki Biełaruś pa daručeńni kiraŭnika dziaržavy. Prahrama maje na mecie vyrašyć prablemu dastaŭki dziaciej ź viosak u škołu i nazad. Na zavodzie raspracavali dźvie madeli — MAZ 241 i MAZ 257. Usiaho dla viaskovaj miascovaści vypuściać bolš za 300 školnych aŭtobusaŭ.
