Zachodnija śpiecsłužby sabrali dokazy datyčnaści Rasii da sproby dziaržaŭnaha pieravarotu ŭ Čarnahoryi, paviedamiła hazieta Telegraph sa spasyłkaj na krynicy ŭ brytanskim uradzie
Surazmoŭca paviedamiŭ vydańniu, što dziaržaŭny pieravarot u Čarnahoryi, arhanizavany pry padtrymcy hramadzian Rasii, mieŭsia adbycca 16 kastryčnika minułaha hoda.
Śpiecsłužby ZŠA i Brytanii, jakija akazvali dapamohu Čarnahorskim kaleham, sabrali dastatkova dokazaŭ taho, što pieravarot rychtavaŭsia pry aktyŭnym udziele Rasii, dadaŭ surazmoŭca haziety.
Havorka idzie pra pierachoplenyja telefonnyja razmovy, elektronnuju pierapisku dy inšyja śviedčańni.
Padziei ŭ Čarnahoryi, jak pakazvaje Telegraph, na minułym tydni abmierkavali ministr zamiežnych spraŭ Brytanii Barys Džonsan i dziaržsakratar ZŠA Reks Tylersan padčas ich pieršaj sustrečy.
Čarnahorskija palicejskija viaduć zatrymanaha ŭ sprobie dziaržaŭnaha pieravarotu. Fota VVS
Surazmoŭca haziety zajaviŭ, što ŭ pieravarocie možna było b abvinavacić niekantralavanych rasijskich ahientaŭ i nacyjanalistaŭ.
«Ale ciažka ŭjavić, što ŭsio heta nie atrymała ŭchvały źvierchu», — skazaŭ jon.
Ciapier Interpoł šukaje dvuch hramadzian Rasii Eduarda Šyrokava i Uładzimira Papova, jakija nibyta kuryravali arhanizacyju pieravarotu.
Siarod inšych padazravanych prarasijskija apazicyjaniery.
Adzin ź ich, Niomanie Rystyč, niadaŭna sfatahrafavaŭsia pobač ź ministram zamiežnych spraŭ Rasii Siarhiejem Łaŭrovym padčas vizitu apošniaha ŭ Sierbiju.
Pa dadzienych brytanskich śpiecsłužbaŭ, putčysty pavinny byli ŭdzielničać u masavaj apazicyjnaj demanstracyi pierad abviaščeńniem vybaraŭ u parłamient Čarnahoryi.
Paśla zmoŭščyki mieli namier trapić u budynak parłamienta, a pieraapranutyja palicejskimi ŭdzielniki zmovy adkryć ahoń pa mirnym natoŭpie, kab paśla abvinavacić va ŭsim ułady i spravakavać źviaržeńnie premjer-ministra Miła Džukanaviča.
Metaj pieravarotu nazyvałasia supraćdziejańnie ŭstupleniu Čarnahoryi ŭ NATA i dopusk rasiejskich karabloŭ u party hetaj krainy na Adryjatyčnym mory.
Čarnahorskija ŭłady ŭžo paśla parłamienckich vybaraŭ zajavili, što praduchilili sprobu pieravarotu, zatrymaŭšy hrupu hramadzian Sierbii.
Niekalki rasijan, pa dadzienych sierbskich ŚMI, byli departavanyja z krainy «za ŭdzieł u padrychtoŭcy terarystyčnych akcyj».
Kreml zajaŭlaŭ ab niedatyčnaści da padziejaŭ u Čarnahoryi.
«Biezumoŭna, my kateharyčna admaŭlajem mahčymaść aficyjnaj datyčnaści da lubych sprobaŭ arhanizacyi niejkich supraćpraŭnych dziejańniaŭ», — kazaŭ 7 listapada pres-sakratar prezidenta Dźmitryj Piaskoŭ.
A rasijski MZS jašče ŭ kastryčniku nazyvaŭ «tryźnieńniem» infarmacyju ab departacyi rasiejcaŭ ź Sierbii.
Pa dadzienych telekanała RBK, čarnahorskija apazicyjaniery sapraŭdy byli źviazany z Rasiejaj i ź sierbskimi vielmi pravymi arhanizacyjami.
