Biełarusy acanili azierbajdžanskuju naftu dosyć nizka, tamu my vymušany byli admović im u dalejšym supracoŭnictvie. Pra heta zajaviŭ Echo.az kiraŭnik Centra naftavych daśledavańniaŭ Ilcham Šaban.
Pavodle jaho słoŭ, u 2016 hodzie hodzie Azierbajdžan paśpieŭ adpravić u Biełaruś tolki adnu partyju nafty ŭ abjomie bolš čym 500 tysiač ton.
«Pastaŭka była ažyćcioŭlena pa rasiejskim maršrucie. Ale ŭžo ŭ pačatku biahučaha hoda pastaŭki azierbajdžanskaha «čornaha zołata» spynilisia.
Jak paviedamlajuć biełaruskija ŚMI, urad ich krainy płanavaŭ kuplać azierbajdžanskuju naftu ŭsiaho za 30 dalaraŭ za baral. To bok pa tym ža košcie, što Biełaruś impartuje rasijskuju naftu. Azierbajdžan ža realizuje naftu pa kamiercyjnym košcie, dakładniej — rynkavym košcie»,
— adznačyŭ ekśpiert.
«Našu krainu nie zacikavili cenavyja ŭmovy Biełarusi, tamu Azierbajdžan vymušany byŭ admović. Varta adznačyć, što bartarnyja ŭmovy taksama nie cikaviać našu krainu, bo Azierbajdžan skiravany na pryciahnieńnie valuty ŭ Dziaržaŭny naftavy fond. Siońnia hetaje pytańnie maje stratehičny charaktar dla krainy», — skazaŭ jon.
Miž tym pieršy prarektar pa mižnarodnym supracoŭnictvie i źniešnich kamunikacyjach Finansavaha ŭniviersiteta pry ŭradzie RF, hiendyrektar Fondu nacyjanalnaj enierhietyčnaj biaśpieki Kanstancin Simanaŭ zajaviŭ, što ni ŭ Iranie, ni ŭ Azierbajdžanie niemahčyma znajści siońnia vialikija svabodnyja abjomy nafty, dastaŭka jaje moram i čyhunkaj budzie kaštavać zanadta doraha.
«Nijakich alternatyŭ u Biełarusi niama. Čamu? Tamu što heta nie tolki pytańnie abjomu. Pierš za ŭsio, heta pytańnie cany. Nie ŭ pieršy raz Łukašenka zajaŭlaje hetuju temu, što Biełaruś budzie zakuplać inšuju naftu»,
— skazaŭ Simanaŭ, paviedamlaje «Sputnik-Biełaruś».
«Kab zamianić rasiejskuju naftu, treba ŭziać naftu, supastaŭnuju pa jakaści, u nieabchodnych abjomach. Nieabchodny abjom vychodzić prykładna 20 miljonaŭ ton. Heta niemaleńki abjom. Heta za 140 miljonaŭ baralaŭ. Dzie vy takija abjomy znojdziecie ciapier na rynku?» — zadaŭ pytańnie Simanaŭ.
U Azierbajdžanie lišniaj nafty prosta niama, dadaŭ jon. Bolš za toje, praciahnuŭ Simanaŭ, ciapier hetaja kraina skaračaje zdabyču ŭ ramkach pahadnieńnia z APIEK, u tym liku i tamu, što nie moža jaje abjektyŭna naraścić.
