Abjadnanyja Arabskija Emiraty nakiravali aficyjnuju notu pratestu ŭ MZS Łatvii paśla taho, jak supracoŭniki mižnarodnaha aeraporta Ryhi zapatrabavali ad novaj ambasadarki AAE ŭ krainie Chanan Chałfan Abajda Ali al-Madani źniać chidžab. Abu-Dabi abvinavaciŭ Łatviju ŭ niepavazie da musulmanskich tradycyjaj i dypłamatyčnaha imunitetu al-Madani, pieradaje DELFI.
Kali ambasadarka pryjechała ŭ Łatviju, supracoŭniki aeraporta zapatrabavali, kab jana źniała tradycyjnuju musulmanskuju vopratku i chidžab. Al-Madani, u svaju čarhu, zajaviła, što moža zrabić heta tolki ŭ schavanym ad vačej inšych pamiaškańni i tolki ŭ prysutnaści žančyn, adnak takoj mahčymaści piersanał aeraporta joj nie daŭ.
Akramia taho, dypłamatka paskardziłasia na abraźlivyja kamientary z boku supracoŭnikaŭ ryžskaha aeravakzała. Pavodle infarmacyi krynicy, MZS Łatvii ŭ ciapierašni čas vyvučaje abstaviny zdareńnia.
Pradstaŭnica ryžskaha aeraporta Łaŭra Karnite ŭžo zajaviła, što pravierki ŭ aeraporcie prachodziać u adpaviednaści ź jeŭrapiejskimi patrabavańniami da biaśpieki avijapieralotaŭ. Jana padkreśliła, što nijakich interpretacyj nie dapuskajecca.
Anałahičnuju zajavu pradstaŭniki aeraporta nakiravali i ŭ ambasadu AAE ŭ Łatvii. Miž tym u AAE adznačyli, što supracoŭniki słužby biaśpieki ryžskaha aeraporta, «vidavočna, nie razumiejuć usiu dalikatnaść dypłamatyi».
