Zvalnieńnie Valeryja Capkały z pasady kiraŭnika administracyi Parka vysokich technałohij stała dla mnohich niečakanym. Choć čutki pra heta musiravalisia na praciahu apošnich niekalkich miesiacaŭ vielmi ŭparta. Jak by tam ni było, dyrektarstva Valeryja Capkała stała historyjaj. Ciapier cikava, chto moža ŭznačalić PVT.
Dziaržaŭnaja ŭstanova «Administracyja Parka vysokich technałohij» stvorana ŭ adpaviednaści z dekretam ad 22 vieraśnia 2005 h. № 12 «Ab Parku vysokich technałohij». Administracyja PVT padparadkoŭvajecca Alaksandru Łukašenku i padspravazdačnaja Savietu ministraŭ. Vidavočna, što novym kiraŭnikom akažacca chtości z kadravaha reziervu prezidenta. Pa infarmacyi TUT.BY, uznačalić adnu ź niamnohich halin, jakaja navat u kryzis pakazvaje rost, nie admovilisia b mnohija. Prablema ŭ tym, što ŭ joj treba dobra raźbiracca. Heta značna składaniej, čym handlavać zvykłymi cukram, meblaj abo majtkami. Jak važna i inšaje — nie nałamać droŭ u hetaj śfiery. Tamu što pryznačeńnie absalutna čužoha čałavieka moža vyklikać abureńnie ajcišnikaŭ, jakija lohkija na ŭzdym. Zychodziačy z hetych klučavych pasyłaŭ, TUT.BY i sfarmavaŭ pieralik pretendentaŭ na pasadu kiraŭnika PVT.
Samym realnym kandydatam na pasadu novaha kiraŭnika parka źjaŭlajecca ciapierašni staršynia naziralnaj rady PVT Usievaład Jančeŭski. Čałavieka z abojmy Łukašenki ŭ 2008 hodzie pryznačyli pamočnikam prezidenta — načalnikam hałoŭnaha ideałahičnaha ŭpraŭleńnia Administracyi prezidenta. Praź niekalki hadoŭ dziaržava daručyła jamu kuryravać śfieru infarmatyzacyi i vysokich technałohij. Da hetaha jon stajaŭ la vytokaŭ stvareńnia Biełaruskaha patryjatyčnaha sajuza moładzi, deputatstvavaŭ i byŭ hałoŭnym redaktaram časopisa «Płanieta», jaki vydajecca «Biełtranshazam». Pavodle infarmacyi TUT.BY, u apošni čas pamiž dvuma kuratarami haliny Capkała i Jančeŭskim nie było poŭnaha ŭzajemaparazumieńnia.
U kułuarach hučyć taksama imia ciapierašniaha pieršaha namieśnika kiraŭnika Administracyi prezidenta Maksima Ryžankova. Zdavałasia b, što moža źviazvać Ryžankova, jaki pakul bolš śpiecyjalizavaŭsia na sporcie, z IT-śfieraj? Capkała pryjšoŭ u PVT, budučy karjernym dypłamatam. Ryžankoŭ taksama daśviedčany dypłamat. Jon taksama małady, cikavicca novymi technałohijami i dobra viedaje anhielskuju movu. Moža atrymacca dobry pasiarednik pamiž uładaj i IT-supolnaściu (u tym liku i mižnarodnaj). Ale ci dastatkova hetaha dla kiraŭnictva PVT?
U apošni čas Alaksandr Łukašenka pryznavaŭ zasłuhi i dasiahnieńni biełaruskich ajcišnikaŭ, adnak vykazaŭ i šerah pretenzij. Adna z apošnich tyčyłasia ŭchileńnia ad vypłaty padatkaŭ u poŭnaj miery ŭ Biełarusi. «Chłopcy, chopić žartavać», — skazaŭ Łukašenka i daručyŭ siłavikam pravieści z ajcišnikami prafiłaktyčnuju hutarku. Tamu adna z kandydatur bačycca z hetaha siektara. Vysokapastaŭlenaha čałavieka ŭ pahonach naŭrad ci prymie IT-supolnaść. Ale vychadziec sa śpiecsłužbaŭ — čamu b i nie. Naprykład, u naziralnuju radu PVT uvachodzić Kanstancin Šulhan, namieśnik načalnika Apieratyŭna-analityčnaha centra pry prezidencie.
Jašče adna kandydatura, jakaja bačycca łahičnaj, — heta čałaviek z dośviedam raboty ŭ IT-biznesie. Naŭrad ci taki jość u kadravym reziervie prezidenta. Ale kali my chočam ździejśnić praryŭ u śfiery vysokich technałohij, to prafiesijanał z haliny bačycca prydatnaj kandydaturaj. Pieršym na rozum prychodzić Leanid Łoźnier. Jon užo nie zajmajecca apieratyŭnaj dziejnaściu ŭ EPAM Systems. Takim čynam, moža być źviedzieny da minimumu kanflikt intaresaŭ. U Biełarusi jon bolš viadomy zaraz prajektami ŭ halinie IT-adukacyi, navuki i robatatechniki. Adnak vialikaje pytańnie, ci zachočuć pradprymalniki zaprahacca ŭ biełaruskuju dziaržsłužbu i zajmacca raźvićciom PVT.
