1 žniŭnia pasolstva Litvy ŭ Minsku adnović pryjom dakumentaŭ ad hramadzian Biełarusi. Pra heta BiełaPAN paviedamiła pres-ataše pasolstva Kryścina Pakanite.
Nahadajem, pryjom dakumentaŭ byŭ časova spynieny ŭ suviazi z aktam vandalizmu, što adbyŭsia ŭ noč z 24 na 25 lipienia. Nieviadomyja kinuli na terytoryju pasolstva butelki z farbaj, a taksama razmalavali aharodžu dyppradstaŭnictva symbolikaj Nacyjanał-balšavickaj partyi (NBP) — niezarehistravanaj pravaradykalnaj arhanizacyi. Z nahody hetaha pasoł Litvy ŭ Biełarusi Edminas Bahdonas vykazaŭ pratest pradstaŭnikam biełaruskaha MZS z patrabavańniem vyśvietlić sytuacyju, znajści vinavatych, a taksama pryniać miery pa niedapuščeńni ŭ budučyni parušeńnia imunitetu pasolstva Litvy i vykanańni norm Vienskaj kanvencyi 1961 hoda.
Pavodle słoŭ K.Pakanite, vydača pašpartoŭ tym, chto padaŭ dakumenty da incydentu, praciahvajecca ŭ zvyčajnym režymie.
U suviazi ź incydentam biełaruskimi pravaachoŭnymi orhanami raspačata sprava pa č. 1 art. 339 (chulihanstva) Kryminalnaha kodeksa Biełarusi. "My nie kamentujem hety incydent, pakolki idzie śledztva", — zaznačyła pres-ataše pasolstva.
Tym časam na rasijskim sajcie NBP pryvodzicca tekst ulotki, jakaja była zakinutaja na terytoryju litoŭskaha pasolstva ŭ Minsku razam z butelkaj z farbaj. U joj vykazany pratest suprać pryniatych u Litvie papravak da zakona ab schodach, što zabaraniajuć vykarystoŭvać padčas masavych mierapryjemstvaŭ symbali nacysckaj Hiermanii i Savieckaha Sajuza. "Zabarona zakranuła savieckuju piacikancovuju čyrvonuju zorku, sierp i mołat, a taksama himny Savieckaha Sajuza i Litoŭskaj SSR", — zaznačajecca va ŭlotcy. Prychilniki NBP ličać, što "pryraŭnoŭvańnie savieckaj atrybutyki da nacysckaj źjaŭlajecca najhrubiejšaj sprobaj pierahladu vynikaŭ Vialikaj Ajčynnaj vajny, admaŭleńniem roli Savieckaha Sajuza ŭ vyzvaleńni śvietu ad nacyzmu".
