Pry kancy 2016 hoda Fiederacyja futboła Biełarusi i kulturnaja placoŭka «Art Siadziba» abviaścili tvorčy konkurs «Mova — Muzyka — Futboł».
Arhanizatary atrymali 20 tvoraŭ jak ad maładych hurtoŭ i vykanaŭcaŭ, tak i prafiesijnych muzykaŭ z roznych kutkoŭ Biełarusi. U nastupny etap prajšli 11 piesień, jakija byli dapracavany, a niekatoryja z nula zapisany ŭ prafiesijnaj studyi.
Ciapier, u nastupnym etapie prajekta, zvyčajnyja słuchačy razam z zaprošanym žury vyznačać šeść najlepšych piesień, što projduć u paŭfinał.
Pradstaŭlajem Vašaj uvazie 11 piesien — 11 novych hulcoŭ biełaruskaha futboła, muzyčna-futbolnaja zbornaja Biełarusi. Słuchajcie, natchniajciesia, hałasujcie, vykazvajcie vašyja mierkavańni.
Narodnaje hałasavańnie budzie doŭžycca da 26 sakavika na partale Tut.by, paralelna svoj rejtynh budzie składać i zaprošanaje žury.
Pasłuchać usie 11 piesień i prahałasavać možna tut!
Skład žury:
Arciom Bykaŭ — futbalist kłuba «Dynama Minsk», nieadnarazovy pryzior čempijanataŭ Biełarusi pa futbole;
Dźmitryj Hierčykaŭ — namieśnik staršyni departamienta markietynhu i kamunikacyj ABFF, spartyŭny kamientatar;
Kirył Klimiankoŭ — žurnalist, redaktar partała sport.tut.by;
Aleś-Francišak Myškievič — muzyka hurtoŭ «The Superbullz» i «Krambambula»;
Arciom Łukjanienka — udzielnik hurta «NaviBand», suaŭtar aficyjnaha saundtreka nacyjanalnaj zbornaj Biełarusi pa futbole.
Jak budzie abiracca šaściorka paŭfinalistaŭ?
Pa vynikach narodnaha hałasavańnia budzie vyznačany rejtynh piesień ad 1 da 11, adpaviedna pieśnia, jakaja budzie na pieršym miescy, atrymaje 11 bałaŭ, a na 11-m — 1 bał.
Takim ža čynam kožny ŭdzielnik žury składzie svoj asabisty rejtynh, jakija razam z kamientarami buduć taksama apublikavany. Z hetych mierkavańniaŭ budzie składzieny vynikovy rejtynh žury.
Bały žury i narodnaha hałasavańnia ŭ praporcyi 50 na 50% buduć składzienyja, i my atrymajem ahulny rejtynh.
Paŭfinały i finalny kancert
Šeść piesień i ich vykanaŭcy buduć padzieleny na dva paŭfinały. U krasaviku paŭfinały-kancerty projduć ŭ minskim kłubie «Hraj». Pa vynikach kancertnych vystupaŭ naprykancy kožnaha z dvuch mierapryjemstvaŭ žury razam z hledačami vyznačać finalistaŭ. Dva finalisty i pazmahajucca za hałoŭnyja pryzy.
Pieramožcu vyznačyć pašyrany skład žury z futbalistaŭ, muzykaŭ, muzyčnych krytykaŭ, viadomych ludziej Biełarusi, jakija na kamieru buduć ahučvać svoj vybar. Videa z vyznačeńniem pieramožcy ŭsie ŭbačać na śviatočnym kancercie.
Pieramožcy, pryziory i ŭładalniki śpiecyjalnych pryzoŭ buduć abvieščany na vialikim finalnym kancercie, jaki projdzie naprykancy traŭnia. Akramia vystupleńnia pieramožcaŭ i zaprošanych zorak, na mierapryjemstvie adbudziecca premjera klipa dla lepšaj pieśni i prezientacyja muzyčnaj składanki «Mova — Muzyka — Futboł» ź pieśniami pa-biełarusku pryśviečanymi futbołu, jakija stvaryli biełaruskija muzyki za 26 hadoŭ niezaležnaści Biełarusi.
Što atrymajuć pieramožcy:
1 miesca — klip ad viadomaha biełaruskaha klipmejkiera Arcioma Łobača, zapis pieśni na studyi «Bah Records», vystupleńnie na finalnym kancercie prajekta i na «Barysaŭ-Arenie» ŭ ramkach adnaho z matčaŭ nacyjanalnaj zbornaj Biełarusi, ratacyja pieśni na radyjo, futbolny miač z aŭtohrafami hulcoŭ zbornaj.
2 miesca — zapis pieśni na studyi «Bah Records», vystupleńnie na finalnym kancercie prajekta i na «Barysaŭ-Arenie» ŭ ramkach adnaho z matčaŭ nacyjanalnaj zbornaj Biełarusi, ratacyja pieśni na radyjo, abaniemienty na chatnija hulni zbornaj.
3 miesca (naminacyja «Hladackija simpatyi») — zapis pieśni na studyi «Bah Records», prafiesijny vakalny mikrafon, vystupleńnie na finalnym kancercie prajekta.
Taksama buduć vyznačanyja pieramožcy ŭ dadatkovych naminacyjach «Lidary sacyjalnych sietak», «Vybar hienieralnaha sponsara», «Pieśnia stadyjona», «Vybar Biełakryłych».
Hetyja pieramožcy atrymajuć padarunki ad arhanizataraŭ i partnioraŭ konkursu: abaniemienty na chatnija hulni nacyjanalnaj zbornaj i biełaruskich kłubaŭ, atrybutyku zbornaj (majki, repliki, šaliki), suvieniry ad symbal.by i inšyja pamiatnyja padarunki.
Usie ŭdzielniki konkursu atrymajuć zaprašalniki na finalny fiestyval i muzyčny dysk «Mova — Muzyka — Futboł» ad kampanii «Płanieta Vihma» z konkursnymi pracami, a taksama pieśniami, napisanymi raniej u Biełarusi pra futboł i dla futboła.
Konkursnyja pieśni možna pasłuchać ci spampavać tut:
VK,
SoundCloud,
YouTube
