 |
Stancyja metro «Kastryčnickaja», jakaja ŭžo amal dva miesiacy začynienaja na rekanstrukcyju, adčynicca nie raniej za kastryčnik. Raniej mienskija ŭłady zapeŭnivali, što rekanstrukcyja pierasadačnaha vuzła budzie skončanaja da 1 vieraśnia.
Ciapier dyrekcyja pa budaŭnictvie Mienskaha metrapalitenu kaža ŭžo pra bolš poźnija terminy — kaniec vieraśnia. A picierskaja kampanija, jakaja zajmajecca ŭstalavańniem eskalataraŭ, zajaŭlaje, što pracy buduć zavieršanyja bližej da siaredziny kastryčnika.
Jak paviedamili ŭ dyrekcyi pa budaŭnictvie Mienskaha metrapalitenu, na «Kastryčnickaj» užo całkam demantavanyja staryja eskalatary j ich padmurak, a taksama zality novy padmurak. Ciapier važny etap — ustalavańnie novych eskalataraŭ, jakija byli zroblenyja va Ŭkrainie. Adnak u Biełarusi nie znajšłosia takich specyjalistaŭ, zdolnych vykanać pracu takoj składanaści, tamu mantažnikaŭ daviałosia šukać za miažoj, paviedamlaje hazeta «Respublika».
«Damova padpisanaja z kampanijaj z Sankt‑Pieciarburhu, jakaja zajmajecca mantažom, ramontam i absłuhoŭvańniem eskalataraŭ. U niadzielu try bryhady prybyli ŭ Miensk i ŭ paniadziełak prystupili da pracy, — kaža Alaksiej Murač, hałoŭny inžyner KUP «Dyrekcyja pa budaŭnictvie Mienskaha metrapalitenu». — Siońnia terminy zaviaršeńnia ŭsich prac udakładniajucca. Aryjencirovačny čas zakančeńnia mantažu — kaniec vieraśnia».
Jak paviedamili ŭ picierskaj kampanii, zadačy pierad mantažnikami stajać składanyja.
«Pavodle damovy našyja specyjalisty musili byli prybyć u Miensk i pačać mantaž eskalataraŭ jašče 14 lipienia. Ale da hetaha času placoŭka na «Kastryčnickaj» była nie hatovaja, — kaža Jaŭhien Manievič, načalnik kamercyjnaha adździełu ZAT «ES‑Servis», — Značyć, z ulikam usiaho abjomu pracy, eskalatary buduć sabranyja bližej da siaredziny kastryčnika».
