Rasija refinansuje daŭhavyja abaviazacielstvy Biełarusi ŭ pamiery $ 750-800 miljonaŭ, paviedamiŭ siońnia žurnalistam pieršy namieśnik premjer-ministra Biełarusi Vasil Maciušeŭski.
Pa słovach Vasila Maciušeŭskaha, na sustrečy Alaksandra Łukašenki i Uładzimira Pucina 3 krasavika dasiahnuta pryncypovaje rašeńnie ab refinansavańni sioleta daŭhavych abaviazacielstvaŭ Biełarusi.
«Havorka išła ab refinansavańni tych daŭhoŭ, jakija ŭ nas sfarmavalisia ŭ ramkach našaha dvuchbakovaha paradku. Hetaje pytańnie razhladałasia jašče ŭ minułym hodzie, i ciapier my viarnulisia da jaho i znajšli mahčymym pryncypovaje vyrašańnie», — adznačyŭ pieršy vice-premjer.
«My havorym ab refinansavańni doŭhu, jaki ŭ nas da pahašeńnia ŭ ramkach našych miždziaržaŭnych kredytaŭ pa hetym hodzie. Heta kala $ 750-800 młn — asnoŭny doŭh i suma pracentaŭ da pahašeńnia ŭ hetym hodzie, — skazaŭ Vasil Maciušeŭski. — Pryncypovaje rašeńnie ab refinansavańni daŭhavych abaviazacielstvaŭ pryniata, ciapier idzie praces farmalizacyi dasiahnutych damoŭlenaściej». Dla hetaha spatrebicca ŭniasieńnie źmianieńniaŭ u biudžet, adpaviednaja praca budzie iści na ŭzroŭni Ministerstva finansaŭ i parłamienta Rasii.
Na sustrečy kiraŭnikoŭ dziaržaŭ taksama išła havorka ab uzajemadziejańni Biełarusi ź Jeŭrazijskim fondam stabilizacyi i raźvićcia. «Uładzimir Pucin byŭ prainfarmavany ab realizacyi Biełaruśsiu prahramy ŭ ramkach Jeŭrazijskaha fondu stabilizacyi i raźvićcia, peŭnych pytańniach i šurpataści, jakija byli ŭ realizacyi hetaj prahramy», — zajaviŭ pieršy vice-premjer.
Pavodle jaho słoŭ, hetyja pytańni nie nosiać pryncypovaha charaktaru, jany bolš techničnaha płanu. «Na ŭzroŭni prezidenta Rasii my atrymali padtrymku našym inicyjatyvam u častcy dalejšaha praciahu hetaj prahramy. Uładzimir Pucin abiacaŭ akazać usialakaje sadziejničańnie, kab prahrama ź JEFSR praciahvałasia», — dadaŭ Vasil Maciušeŭski.