Mužčyna ŭ Minsku vykinuŭ kotku z 12-ha paviercha, a potym udaryŭ nažom sužycielku. Pra heta ŭ efiry «Alfa-radyjo» paviedamiła aficyjny pradstaŭnik Śledčaha kamiteta Julija Hančarova, paviedamlaje BIEŁTA.
Rasśledavańnie kryminalnaj spravy, źviazanaj z pryčynieńniem ciažkaha cialesnaha paškodžańnia i žorstkim abychodžańniem z žyviołaju, pravodzić upraŭleńnie Śledčaha kamiteta pa Minsku. Jak patłumačyła Julija Hančarova, incydent adbyŭsia ŭ lutym biahučaha hoda. Žančyna viarnułasia dadomu z načnoj źmieny, sužyciel paprasiŭ kupić śpirtnoje. Jana aburyłasia takoj prośbaj, ale potym schadziła ŭ kramu. Mužčyna dasiahnuŭ peŭnaj stupieni ałkaholnaha apjanieńnia i pačaŭ vyśviatleńnie adnosin. Jon źbiŭ paciarpiełuju, a kali taja stała klikać na dapamohu, udaryŭ jaje nažom u žyvot.
Adpaviednaja infarmacyja pastupiła pravaachoŭnikam. Na miesca vybyła śledča-apieratyŭnaja hrupa, jakaja praviała ahlad kvatery i prydamavoj terytoryi. Na vulicy śledčyja znajšli miortvuju kotku. Było vyjaŭlena, što za niekatory čas da incydentu mužčyna vykinuŭ žyviołu z kvatery na 12-m paviersie. Pa zaklučeńni Dziaržkamiteta sudekśpiertyz, kotka zahinuła ad razryvu ŭnutranych orhanaŭ pry padzieńni z vyšyni.
U ciapierašni čas rasśledavańnie kryminalnaj spravy praciahvajecca. Zhodna z toj infarmacyjaj, jakuju śledčyja atrymali ad śviedkaŭ, vidavočcaŭ, susiedziaŭ, adnoj z pryčyn kanfliktu pamiž sužycielami źjaviłasia śmierć hadavanca. Padčas dopytu mužčyna rastłumačyŭ, što zabiŭ kotku, bo jana jamu nadakučyła.
Uličvajučy stupień zroblenaha, śledčymi było pryniataje rašeńnie chadajničać pierad prakuroram ab prymianieńni ŭ dačynieńni da abvinavačanaha miery strymańnia ŭ vyhladzie zaklučeńnia pad vartu, z čym prakuror pahadziŭsia.
U 2015 hodzie ŭ Kryminalnym kodeksie Biełarusi źjaviłasia artykuł, jaki praduhledžvaje pakarańnie za žorstkaje abychodžańnie z žyviołami. Tak, žorstkaje abychodžańnie z žyviołaj, jakoje paciahnuła jaje hibiel abo kalectva, ździejśnienaje z chulihanskich, karyślivych ci inšych nizinnych pamknieńniaŭ albo ŭ prysutnaści zaviedama małaletniaha, karajecca hramadskimi pracami, štrafam, ci papraŭčymi pracami na termin da adnaho hoda, abo aryštam. Za anałahičnaje pravaparušeńnie, učynienaje paŭtorna albo hrupaj asob, karajuć aryštam, abmiežavańniem voli na termin da adnaho hoda, abo pazbaŭleńniem voli na toj ža termin.
U 2016 hodzie padraździaleńniami Śledčaha kamiteta było raspačata 20 kryminalnych spraŭ pa art. 339-1 KK (žorstkaje abychodžańnie z žyviołaj). U biahučym hodzie raspačatyja dźvie takich kryminalnych spravy.
