Piśmieńnicy, žurnalistcy, stypendyjatcy fondu Mahdaleny Radzivił Darji Lis nieabchodny novy invalidny vazok. Daša žyvie ŭ Zaleśsi na Smarhonščynie, bolš za 20 hadoŭ jana abmiežavanaja ŭ pierasoŭvańni i kantaktach sa źniešnim śvietam.
Na platformie talaka.by ciabry dziaŭčyny arhanizavali zbor srodkaŭ na sučasny niamiecki elektravazok z vertykalizataram, jaki zabiaśpiečyć Dašy zručnaść dy mabilnaść, daść svabodu tvorčaści.
Infarmacyjnym supravadžeńniem prajektu zajmajecca paetka, pierakładčyca Maryjka Martysievič. Vyznačanyja kankretnyja etapy kampanii: ad zboru hrošaj da pieralotu ŭ Bremen dla «prymierki» vazka.
Darja Lis naradziłasia i žyvie ŭ vioscy Zaleśsie na Smarhonščynie. Praz raźvićcio śpinalna-myšačnaj atrafii — hienetyčnaha zachvorvańnia, pry jakim nie pracujuć myšcy noh, hałavy i šyi — padletkam jana straciła mahčymaść samastojna chadzić.
Chvaroba adkarektavała plany dziaŭčyny na prafesiju. U Mienskim linhvistyčnym universytecie, kudy pry kancy 1990-ch Darja chacieła pastupać na francuskaje adździaleńnie, elementarna nie akazałasia liftu, šlach tudy byŭ zakryty ŭ litaralnym sensie. Jana skončyła fakultet biełaruskaj filalohii i kultury Biełaruskaha pedahahičnaha ŭniversytetu, pačała zajmacca litaraturnaj tvorčaściu i žurnalistykaj.
Ciapier Darja Lis supracoŭničaje z «Radyjo Racyja» dy šeraham inšych niezaležnych medyjaŭ, viadzie błoh i piša ŭ sacyjalnych sietkach, zajmaje vyraznuju hramadzianskuju pazycyju.
U 2008 hodzie pabačyła śviet jaje kniha vieršaŭ i apaviadańniaŭ «Viasnovy džaz». U 2013-m Darju pryniali ŭ Sajuz biełaruskich piśmieńnikaŭ.
Niekalki hadoŭ tamu siamji z dapamohaj siabroŭ udałosia nabyć dla Darji elektravazok. Z taho času jana zmahła vandravać — z baćkami jeździć pa Biełarusi, u Vilniu, Biełastok, na Bałtyku. Adnojčy pabyvała ź siabroŭkaj u Paryžy. Jaje čakajuć u Italii, ZŠA, Niamieččynie, ale z techničnych prablemaŭ realizavać plany nie ŭdajecca.
Darohi ŭ Zaleśsi i vakolicach nia lepšaj jakaści i ciapierašni elektravazok zusim rastreśsia.
Paŭstała nieabchodnaść u novym. Da taho ž, technalohii iduć napierad, jość mahčymaść vybrać varyjant z tak zvanym vertykalizataram. Taki vazok dazvalaje karystalniku pryniać vertykalnaje stanovišča, jak by «stajać», a nie «siadzieć». Takaja mahčymaść źmianšaje nastupstvy pastajannaha znachodžańnia ŭ siadziačym/lažačym stanoviščy, razhružaje tazaściohnavyja sustavy, dapamahaje daciahvacca da palicaŭ.
U sakaviku 2017 hodu Darja Lis atrymała stypendyju imia Mahdaleny Radzivił dla piśmieńnic i pierakładčyc.
Žury pad staršynstvam Śviatłany Aleksijevič abrała troch aŭtarak, jakim dla tvorčaha šturška nieabchodnaja finansavaja padtrymka.
Pavodle ŭmovy, stypendyjatki atrymali pa 2000 rubloŭ, jakija mohuć patracić na ŭłasnyja patreby. Darja ŭspryniała ŭhanaravańnie jak pieršy krok da realizacyi svajoj mety, bo svaju svabodu tvorčaści naŭprost źviazvaje z mabilnaściu. Ale hetych srodkaŭ, na žal, niedastatkova.
Madel Ottobock C1000 SF, jakuju možna zamović, kaštuje bolš za 30 tysiač biełaruskich rubloŭ, z padatkami — naohuł 34 tysiačy.
U źviazku z hetym siabry i kalehi abviaščajuć hramadzki zbor srodkaŭ na vazok dla Dašy.
Meta akcyi — dać talenavitaj dziaŭčynie mabilnaść i niezaležnaść, što aŭtamatyčna aznačaje svabodu tvorčaści. A samaje hałoŭnaje — nadzieja na padvyšeńnie jakaści i pavieličeńnie praciahłaści žyćcia.
Hrošy na vazok možna achviaravać na platformie talaka.by ci naŭprost na dabračynny rachunak:
Tranzytny rachunak banka 3812 114 000 312«Pryjorbank» AATKod banka 749UNP 100220190Pryznačeńnie: dla zaličeńnia na dabračynny rachunak № 749142-00631-000001 (Lis Darja Alehaŭna).
Źviestki pra pastupleńnie hrošaj na dabračynny rachunak buduć fiksavacca ŭ ličylniku hetaj kampanii.
Vypravicca ŭ Bremien, kali nieabchodnaja suma budzie sabranaja, Darja planuje sama — technična składany vazok patrabuje abaviazkovaj «prymierki». Hrošy na padarožža dziaŭčyna ŭžo adkłała z žurnalisckich zarobkaŭ.
