U svaim fejsbuku Pavieł Sieviaryniec padzialiŭsia ŭražańniami ad znachodžańnia na Akreścina, dzie jon pravioŭ 10 sutak za adnu z akcyj u Kurapatach. Nahadajem, što da hetaha Sieviaryniec adbyvaŭ 15 sutak aryštu z 12 pa 27 sakavika za marš niedarmajedaŭ u Oršy. 

«Darahija siabry, znoŭ rady vitać vas. Dziakuj usim, chto padtrymlivaŭ, maliŭsia, pieradavaŭ knihi, sustrakaŭ.

Za 20 hadoŭ, z 1997-ha, na Akreścina byvaŭ razoŭ piatnaccać. Apošnija dziesiać sutak urazili, bo jość z čym paraŭnoŭvać.

1. Vidavočna, vykonvali speczakaz: dva razy ŭpichvali ŭ kameru na čatyroch čałaviek žycharoŭ vakzału z vošami. Siadzić-siadzić taki dzied, maŭčyć, raptam zahalajecca i pačynaje, byccam z aŭtamata, z treskam łuščyć u paznohciach nasiakomych dy hnidaŭ. Bachajem u dźviery. «Pražarka» nie pracuje, čakajcie.

2. Moj susied dvojčy rezaŭ ruki — praz paru chvilinaŭ možna ŭbačyć, što takoje «ruki pa łokać u kryvi». I z-za «padarunkaŭ» z vošami, i z-za taho, što nie vyvodziać na prahułku (a kurcam inakš za dzień nie papalić). Pakul prybirajem kameru ad kroplaŭ dy pyrskaŭ, vyśviatlajecca, što ŭ susieda hiepatyt S.

3. Kožny dzień patrabavali chacia b vienik prybracca ŭ chacie. Vienik, anuču, viadro nie dajuć! 10 sutak… Daviałosia rvać rušniki, kab vymyvać kameru.

4. Papieru i asadku, jakija byli ŭ mianie ŭ asabistych rečach i pieradačach, dazvolili tolki na čaćviortyja sutki, advakat vybiŭ. Toje, što aficyjna dazvolena — zabaraniali, bo «rašeńnie načalnika»!

5. Nasuprać nas paŭdni trymali Viktara z akcyi 25-ha, jaki 10 sutak trymaŭ haładoŭku. Viadoma tolki toje, što jon žyvie nasuprać Nacyjanalnaj biblijateki. Dapamažycie, kali łaska, daviedacca, što z čałaviekam.

6. Maks Viniarski 6 sutak haładavaŭ na IČU, potym pavieźli ŭ špital, adtul jon źnik.

7. Niekalki dzion zapar pryjaždžali opery, składali pratakoły - to za akcyju la KDB, to za ściah la Akreścina. Davać pakazańni admaŭlaŭsia. U piatnicu zavieźli ŭ sud Centralnaha rajonu, aformili štraf 50 bazavych za akcyju salidarnaści z patryjotami.

8. Staŭleńnie da zatrymanych — jak da bydła. Paru replikaŭ spakojna — i raptam kryk, mat-pieramat, pahrozy. Usiaho niekalki čałaviek stavilisia pa-ludzku.

9. Harbata, kipień — tolki raz na sutki, zranku, 150 hramaŭ. Dalej pi z-pad kranu.

10. Sadavina, harodnina pad zabaronaj. U kamery časnyk!!! Aaaaa!!! Na prahułku nia pojdziecie!

11. Tych, kaho dastavili paśla 13.00, nia kormiać uvieś dzień. A potym za poŭnyja sutki vyličvajuć za charčavańnie (!) pa 11 rubloŭ 50 kapiejek.

12. Karaciej, pišam pa instancyjach. I našym miłym eŭrapiejcam, katoryja dahetul z uśmieškaj «viaduć dyjałoh»: smačna vam jeści na aficyjnych pryjomach».

Клас
Панылы сорам
Ха-ха
Ого
Сумна
Абуральна