Čatyrochmietrovuju charuhvu hietmana Kryštofa Radziviła ŭpieršyniu prezientujuć na vystavie ŭ Mirskim zamku. Jak paviedamili BIEŁTA ŭ muziei zamka, na vystaŭcy možna ŭbačyć aryhinalnyja vajennyja charuhvy.
Adkryćcio mižnarodnaha prajekta «Ultima ratio regum. Biełaruś u Paŭnočnych vojnach siaredziny XVII — pačatku XVIII stahodździa» zapłanavana 21 krasavika.
Adna z hałoŭnych zadač sumiesnaha mižnarodnaha prajekta muzieja «Zamkavy kompleks «Mir» i Nacyjanalnaha histaryčnaha muzieja Biełarusi, rehijanalnaha muzieja Biržajskaha kraju «Sieła» (Litva), Muzieja armii (Šviecyja) — raskazać šyrokaj aŭdytoryi nie tolki kłasičnuju historyju Paŭnočnych vojnaŭ, a pierš za ŭsio historyju ludziej, hramadstvaŭ, tahačasnych tavarystvaŭ, dziaržaŭ, vajennych instytutaŭ, vajennaj kultury i technałohij, ich ciesnuju ŭzajemasuviaź i ŭzajemaŭpłyŭ.
Rabota nad maštabnaj vystavaj praciahvałasia dva hady. Niemałuju rolu va ŭvasableńni idei prajekta ŭ realnaść adyhraŭ mižnarodny prajekt MOST i Instytut imia Hiote. U biełaruskaha hledača ŭpieršyniu źjaviłasia mahčymaść aznajomicca z aryhinalnymi vajennymi charuhvami, jakija pryviezieny z Muzieja armii (Stakholm). Asablivaje miesca siarod ekspanataŭ zajmaje čatyrochmietrovaja charuhva hietmana Kryštofa Radziviła z vyjavaj kniažackaha hierba.
Naviedvalnikam vystavy dajecca mahčymaść ujavić, jakim byŭ Mirski zamak i jaho navakolnaja miascovaść u XVII-XVIII stahodździach, a taksama aznajomicca z historyjaj Paŭnočnych vojnaŭ praz hraviravanyja partrety i batalnyja sceny, płany i karty, miedali i maniety, haspadarčyja rečy, ściahi i pradmiety raskošy, redkija artefakty vajny.
Vystava praciahniecca pa 24 vieraśnia.
