U sudzie Maskoŭskaha rajona Minska 27 krasavika prajšoŭ praces pa spravie Viačasłava Kasinierava, anarchista, jaki 12 sakavika nakinuŭ piatlu na pomnik carskamu haradavomu.
Viačasłaŭ Kasinieraŭ
Viačasłava vinavacili ŭ chulihanstvie, jamu pahražała da 3 hadoŭ pazbaŭleńnia voli.
Sam jon nie admaŭlaje, što nakinuŭ viaroŭku na skulpturu. Ale vinu nie pryznaje, bo nie ličyć toje chulihanstvam. Kasinieraŭ nazyvaje svaje dziejańni «pierformansam, nakiravanym suprać milicejskaha biezzakońnia».
Prakuror Jaŭhien Sierdziukoŭ paprasiŭ pakarać Viačasłava Kasinierava abmiežavańniem voli. Jon prapanavaŭ asudzić abvinavačanaha na 2 hady «chatniaj chimii».
U apošnim słovie Kasinieraŭ u čarhovy raz paŭtaryŭ, što jon nie chulihan.
«Maje dziejańni nikoli nie nieśli pahrozy ludziam, u ich nie było hvałtu. I ŭ hety raz ja razumieŭ, što rablu. Ja nie źbiraŭsia łamać ci psavać «pomnik». Našaje hramadstva kryŭdziać nie maje dziejańni, a tyja ludzi, jakija dazvalajuć źbivać inšych, ździekvacca ź ich, — skazaŭ Viačasłaŭ. — Milicyjanty pavinny pakryŭdzicca nie na maje dziejańni, a na toje, što svaimi dziejańniami jany pabudavali sistemu hvałtu».
Ale sudździa Alaksandr Pietraš usio roŭna pryznaŭ Kasinierava vinavatym u chulihanstvie. Praŭda, jon vyrašyŭ, što pakarańnie pavinna być nie takim žorstkim i daŭ Viačasłavu tolki štraf pamieram u 5 bazavych (115 rubloŭ).
Zała sustreła prysud apładysmientami.
«Vielmi niečakana, ja rychtavaŭsia da 1,5 hoda chimii minimum, — skazaŭ Kasinieraŭ «NN». — Tamu chaču padziakavać hramadskaści i žurnalistam, jakija pryciahvali ŭvahu da hetaj historyi».
