16‑hadovaja biełaruska Taciana Kazyra abvierhła infarmacyju ab tym, što amerykanskaja siamja hvałtoŭna ŭtrymlivaje jaje ŭ ZŠA. Ab hetym paviedamlaje hazeta The Press Democrat.
U videainterviju, raźmieščanym na sajcie vydańnia, T.Kazyra zajaviła, što jaje nichto nie prymušaje zastacca ŭ ZŠA. «Heta moj vybar, — skazała jana. — Ja lublu hetu siamju i chaču pabyć tut bolš. Ja adčuvaju, što heta maja sapraŭdnaja siamja i chaču zastacca ź imi».
T.Kazyra taksama zaznačyła, što ŭ Biełarusi ab joj kłapaciłasia tolki babula, a «siabra majho baćki prychodzić z narkotykami ŭ naš dom».
Jak raniej paviedamlałasia, 5 žniŭnia hrupa z 25 biełaruskich dziaciej pavinna była vylecieć ŭ Minsk z San‑Francyska. Da pryznačanaha času ŭ aeraport nie prybyła hramadzianka Biełarusi 1991 hoda naradžeńnia Taciana Kazyra. Paźniej stała viadoma, što jana padała dakumenty ŭ imihracyjnuju słužbu, kab pradoŭžyć haściavuju vizu, i moža zastavacca ŭ ZŠA, kab dačakacca rašeńnia ŭładaŭ.
Miž tym na pres‑kanferencyi 7 žniŭnia ministar adukacyi Alaksandr Radźkoŭ skazaŭ, što «dziaŭčynka zajaviła, što choča viarnucca ŭ Biełaruś». Biełaruskaje MZS razhladaje sytuacyju ź nieviartańniem T.Kazyra z ZŠA jak «niedapuščalnaje parušeńnie dahavornych abaviazacielstvaŭ» u miežach prahramy amerykanskaj arhanizacyi Chernobyl Children's Project.