Fota: Alaksandr Drazdoŭ / TASS
Ryžanaŭ žyvie ŭ pasiołku Łužki Staradubskaha rajona Branskaj vobłaści, jaki znachodzicca za paru kiłamietrach ad ukrainskaj miažy. «Niekatoryja tavary va Ukrainie tańniejšyja, čym u Rasii. Naturalna, miascovyja žychary kuplajuć ich tam, i Ryžanaŭ nie vyklučeńnie. Jon maje znajomych, jakija prychodzili na miažu i pradavali jamu pradukty», — raspavioŭ advakat Jaŭhien Śmirnoŭ.
Tavary jon kuplaŭ dla asabistaha karystańnia, padkreśliŭ abaronca. Sustrečy pryznačalisia nie na pahranpierachodzie, a ŭ baku ad jaho. «Kab nie papaścisia, Ryžanaŭ telefanavaŭ svajmu pryjacielu-pamiežniku, ź jakim razam słužyŭ u vojsku, i pytaŭsia: ci budziecie siońnia patrulavać? Toj jamu adkazvaŭ: nie, siońnia spakojna. Ryžanaŭ u jakaści padziaki davaŭ jamu butelku», — raspavioŭ advakat.
Hetuju situacyju UFSB pa Branskaj vobłaści kvalifikavała jak złačynstva suprać dziaržaŭnaj ułady i abvinavačvaje Ryžanava ŭ niezakonnym atrymańni źviestak, jakija źmiaščajuć dziaržtajnu (art. 283.1 KK RF).
«Moj padabaronny nikoli nie znajomiŭsia z sakretnymi dakumientami i nie maje razumieńnia, jakaja infarmacyja źjaŭlajecca sakretnaj», — piarečyć advakat.
Pryčynaj takoj pilnaj uvahi branskaha UFSB da Ryžanava moža być jaho aktyŭnaja palityčnaja pazicyja, miarkuje advakat: ŭ 2014 hodzie Ryžanaŭ vyjhraŭ miascovyja vybary, staŭ narodnym deputatam i ledź nie byŭ pryznačany kiraŭnikom pasielišča. Sam Ryžanaŭ zhodny z advakatam: «Da taho času, pakul ja nikudy nie bałatavaŭsia, ja nikomu nie patrebny byŭ».
Sud nad pamiežnikam, pryjacielem Ryžanava, užo adbyŭsia. U sakaviku Maskoŭski akruhovy vajskovy sud vynies jamu prysud pa spravie ab vydačy dziaržtajny — 1,5 hoda ŭmoŭna.
Kolkaść ludziej u Rasii, jakich štohod asudžajuć pa artykułach KK ab złačynstvach suprać dziaržaŭnaj ułady, za apošnija hady ŭzrasła ŭ niekalki razoŭ: u 2013 hodzie jana składała 27,5 tys. čałaviek, u 2014 hodzie — 66,1 tys., u 2015 hodzie — 64 tys., a ŭ 2016 hodzie — 71,2 tys. Pošuk «ŭnutranych vorahaŭ» źviazany «ź militarysckaj rytorykaj u palitycy ŭładaŭ», ličyć rasijski pravaabaronca Ivan Paŭłaŭ.