Akvazona centra «Frystajł» začyniena z 8 maja pa techničnych pryčynach. Pra heta havorycca ŭ abjavie na sajcie centra. Učora naviedvalniki paviedamlali: z vyšyni zvalilisia kałonki, paškodzili horku i dziciačuju zonu.
Pryčynu zakryćcia akvazony ŭ centry nie nazyvajuć.
— Akvazona začyniena. Pryčyny nazvanyja ŭ nas na sajcie: techničnyja. Jak nadoŭha — nieviadoma, — nieachvotna adkazvajuć na pytańni pa telefonie ŭ Centry.
Minčanie, jakija byli ŭ akvaparku ŭ vychodnyja, raspaviadajuć, što prosta ŭ kupalnaj zonie abarvalisia dźvie 30-kiłahramovyja muzyčnyja kałonki i paškodzili horki i dziciačuju zonu. Zhnili macavańni. Z naviedvalnikaŭ nichto nie paciarpieŭ. Atrymać paćviardžeńnie abo abviaržeńnie hetaj infarmacyi ŭ kiraŭnictva «Frystajła» pakul nie ŭdałosia - telefon namieśnika dyrektara, da jakoha nakiroŭvajuć u pryjomnaj, nie adkazvaje druhi dzień.
Spartsmieny, što trenirujucca ŭ centry, raspaviadajuć, što taksama čuli pra kałonki, ale ab admienie trenirovak im pakul nichto nie paviedamlaŭ.
Heta ŭžo nie pieršaje zdareńnie ŭ centry «Frystajł». Dva hady tamu, praz paru miesiacaŭ paśla aficyjnaha adkryćcia, u zonie dla trenirovak frystajlistaŭ stali rassypacca trampliny. Akazałasia, što pakryćcio zroblena z parušeńniami: padkładka pad asnoŭnym pakryćciom, jakaja pavinna być vodanieprymalnaj, akazałasia vodanabiralnaj.
Paźniej Departamient pa nahladzie za biaśpiečnym viadzieńniem rabot u pramysłovaści - Dziaržpramnahlad - pravieryŭ spartyŭna-azdaraŭlenčy kompleks «Frystajł» i vyjaviŭ 14 parušeńniaŭ praviłaŭ i normaŭ pramysłovaj biaśpieki.
