1 maja «Naša Niva» apublikavała śpis uładalnikaŭ katedžaŭ u Drazdach.
Nahadajem, košt budaŭnictva katedža ŭ Drazdach vahajecca ad 40 da 200 tysiač dalaraŭ, a rynkavy košt hatovaha žylla - ad 1 miljona dołaraŭ i vyšej. I kali ź biznesmienami ŭsio zrazumieła, to da čynoŭnikaŭ pytańnie zastajecca: «Adkul hrošy na takoje budaŭnictva?».
Jeŭraradyjo zadało hetaje pytańnie niepasredna niekatorym «nabližanym».
«Nu, pa-pieršaje, ja pradała kvateru, - tłumačyć pachodžańnie srodkaŭ na budaŭnictva katedža ŭ Drazdach staršynia Centrvybarkama Lidzija Jarmošyna. - Pa-druhoje, u mianie byli peŭnyja nakapleńni. A pa-treciaje, ja pazyčyła ŭ svaich vielmi zamožnych siabrovak. Heta pryvatnyja nataryusy ŭ horadzie Kalininhradzie. Abyšłosia mnie budaŭnictva pryblizna ŭ 300 tysiač umoŭnych adzinak».
Katedž Lidzii Jarmošynaj
Cikava, što zusim niadaŭna, u intervju Jeŭraradyjo Jarmošyna śćviardžała, što jaje katedž u Drazdach — heta «słužbovaje žyllo», i skardziłasia na vialikuju kvartpłatu.
— Katedž u Drazdach, dzie vy ciapier žyviacie, vam nie naležyć?
— Heta słužbovaje žyllo. Za jakoje ja, darečy, płaču niemaleńkuju kvartpłatu, sama prybirajusia, sama zajmajusia prańniem paścielnaj bializny…
— Niemaleńkaja kvartpłata — heta kolki?
— Niahledziačy na toje, što zimoj my płacim 50% za haz, za apošni miesiac ja zapłaciła 230 rubloŭ. Heta niamała, starymi heta 2 miljony 300 tysiač! Zimoj ja skarystoŭvaju prykładna tysiaču kubamietraŭ hazu, a samaje vialikaje ŭ kvartpłacie — mienavita košt hazu.
— Pojdziecie na piensiju, słužbovaje žyllo ŭ Drazdach zabiaruć — dzie žyć budziecie?
— Pierajedu ŭ svoj dom. U mianie ž jość i ŭłasny dom — ciapier tam syn žyvie, dahladaje jaho. Nam tam chopić miesca dvaim. Ja tudy na vychodnyja chadžu: prybiraju tam, letam kvietki roznyja…
Maje katedž u elitnym pasiołku i były staršynia Kanstytucyjnaha suda dy Hienprakuror Ryhor Vasilevič. Budavaŭsia jon na pačatku 2000-ch, adpracavaŭšy try hady na pasadzie staršyni KS.
«U mianie, biezumoŭna, i svaje srodki byli, i kredyt — zdajecca, adsotkaŭ pad 18 u mianie byŭ kredyt… 18 ci 14% kredyt byŭ, ja ŭžo ciapier dakładna i nie pamiataju. Braŭ jaho ŭ kamiercyjnym banku. I ja, u pryncypie, pastaraŭsia raźličycca za budaŭnictva hetym kredytam», — pryznajecca Ryhor Vasilevič, ale sumu, u jakuju abyšoŭsia katedž, nie nazyvaje.
Katedž Ryhora Vasileviča, fota Jeŭraradyjo
Jak i Lidzija Jarmošyna, były Hienprakuror narakaje na davoli darahoje žyćcio ŭ tych elitnych Drazdach.
«Mahu skazać, što zimoj, asabliva kali marazy mocnyja, to ŭ mianie ahułam za kamunałku vychodzić rubloŭ pad 250 u miesiac. Ničoha ž tam niama ŭcenienaha - tyja ž staŭki, što nazyvajecca. Ja čytaŭ, što nibyta płaciać za katedž niejkich tam 25 rubloŭ. Ale ž heta tolki za vadu pakazali! A dadajcie siudy aciapleńnie, vyvaz śmiećcia dy ŭsio astatniaje, i atrymlivajecca tak, što… - pieraličvaje Ryhor Vasilevič i niečakana pierachodzić na inšuju temu. - U mianie vielmi kruty aŭtamabil - Reno. Jak vam - kruty aŭtamabil, narmalna?»
— Miarkuju, u Reno taksama mohuć być darahija elitnyja madeli…
— Renault «Sandero». I tamu, kali kaho zajzdraść biare, to mahu pakatać na svaim aŭtamabili. Zvazić na Filimonava ci na Kamiennuju Horku i pakazać, jakija tam šykoŭnyja katedžy stajać. Voś, mianie lubiać paprakać maim «asablivym mierkavańniem» (Vasilevič u jakaści sudździ Kanstytucyjnaha suda vykazaŭsia na karyść źmienaŭ Kanstytucyi, prapanavanych Alaksandram Łukašenkam, i padtrymaŭ refierendum 1996 hoda), ale ja ich vykazvaŭ adkryta. Chaj hetak ža adkryta svaje pretenzii mnie kamientatary roznyja vykazvajuć — napišuć imia, proźvišča i miesca žycharstva, i tady palivajuć mianie brudam».
Piać hadoŭ tamu ŭčastak u Drazdach «prapanavali» staršyni Biełdziaržteleradyjokampanii Hienadziu Davydźku. Kaža, admoviŭsia b, ale dačka, architektar pa adukacyi, źjeździła na miesca, pahladzieła, prykinuła i ŭhavaryła pačać budavacca.
«A sam by ja nie budavaŭsia b, kali u mianie dačka nie była architektaram i nie rabiła tannym hety prajekt. Pa-druhoje, nie było b budaŭnictva, kali b my dvuma siemjami nie skłalisia. Dom, darečy, budujecca na dźvie siamji. Kali b mnie nie pazyčyli hrošy siabry, kali b ja nie ŭziaŭ kredyt - viadoma, ja b nie budavaŭsia. A tak, daviałosia, i budujusia. Praŭda, nie viedaju, kolki budu budavacca: voś, užo piać hadoŭ budujusia, i jašče budu budavacca. A što tut bolš kazać? Tym bolš, što ja padkantrolny, i ŭsie adpaviednyja instancyi bačać maju dekłaracyju ab dachodach…» — kaža Davydźka.
Katedž Hienadzia Davydźki jašče budujecca, fota Jeŭraradyjo
Pa słovach Davydźki, pryblizny košt budoŭli dačka skłała, ale nazyvać hetuju sumu kiraŭnik BT nie zachacieŭ. Tolki skazaŭ, što navat nie ŭjaŭlaje, jak vyhladaje miljon dołaraŭ. «Moža, chto z apazicyi viedaje, jak jon vyhladaje!» - nie zabyvajecca adznačyć Davydźka.
