Letni fiestyval baleta projdzie ŭ Minsku z 11 pa 18 červienia, paviedamili BIEŁTA ŭ Nacyjanalnym akademičnym Vialikim teatry opiery i baleta Biełarusi.
Adkryje «Baletnaje leta ŭ Vialikim» śpiektakl «Lebiadzinaje voziera» Piatra Čajkoŭskaha. Hałoŭnyja partyi 11 červienia buduć tancavać salisty baleta Nacyjanalnaj opiery Ukrainy Nastaśsia Šaŭčenka i Stanisłaŭ Alšanski, 12 červienia — Nino Samadašvili z Hruzinskaha teatra opiery i baleta i Ihar Kołb z Maryinskaha teatra.
Hości z teatra «Astana Balet», što zajmaje adno ź viadučych miesc siarod baletnych kalektyvaŭ Kazachstana, na scenie Vialikaha teatra Biełarusi pradstaviać svaje raboty: 13 červienia — adnaaktovyja balety «Love Fear Loss», «Gaia» i tancavalnuju prahramu «Astana Balet GALA», 14 červienia — «Karmen» i «Diversity», 15 červienia — «Tumany času» i «Pavolny ahoń».
Viečar adnaaktovych baletaŭ z udziełam biełaruskich artystaŭ adbudziecca 16 červienia. Hledačy ŭbačać hran-pa z baleta «Pachita» Ludviha Minkusa, balet «Saniety» na muzyku Pitera Uorłaka i Ralfa Voan-Uiljamsa i «Šeść tancaŭ» na muzyku Volfhanha Amadeja Mocarta. Za dyryžorskim pultam u hety viečar - Ivan Kaściachin i Mikałaj Kaladka.
Zavieršycca fiestyval 18 červienia hała-kancertam zorak suśvietnaha baleta, u jakim prymuć udzieł hości z Rasii, Kazachstana, Polščy, Hiermanii i artysty Vialikaha teatra Biełarusi. U ich liku - premjer Vialikaha teatra Rasii Michaił Łabuchin, salistka baleta Opiernaha teatra Hanoviera Alaksandra Lašenka, salistka Bavarskaj dziaržaŭnaj opiery biełaruska Taćciana Cilihuzava i salist Nacyjanalnaha baleta Polščy biełarus Maksim Vajciul.
