Prakuratura Kryma padpisała apaviaščeńnie ab padazreńni Iosifu Stalinu i Łaŭrenciju Bieryi ŭ hvałtoŭnym pierasialeńni ŭ 1944 hodzie krymskatatarskaha naroda i pradstaŭnikoŭ inšych nacyjanalnych hrup z terytoryi Krymskaj ASSR.
Pra heta havorycca ŭ paviedamleńni pres-słužby Hienieralnaj prakuratury ŭ čaćvier, piša UP.
U paviedamleńni pakazvajecca, što ŭ śniežni 2015 hoda prakuraturaj Aŭtanomnaj Respubliki Krym było pačataje rasśledavańnie ŭ adpaviednaj kryminalnaj spravie.
«Za paŭtara hoda ŭ chodzie dasudovaha śledstva ŭ dziaržaŭnyja archivy nakiravana 53 zapyty, 52 — u vyšejšyja navučalnyja ŭstanovy i 67 — u navukovyja biblijateki. Infarmacyja źbirałasia pa ŭsich ustanovach na terytoryi Ukrainy. Atrymanaja infarmacyja apracavanaja i składzienyja 103 pratakoły ahladu nazvanych dakumientaŭ», — havorycca ŭ zajavie.
Pavodle paviedamleńnia, prakuratura nakiravała zapyty ab mižnarodnaj pravavoj dapamozie ŭ Respubliku Uźbiekistan, Kazachstan i Rasijskuju Fiederacyju.
«Akramia hetaha ahledžana 310 tamoŭ kryminalnaj spravy, u jakoj 13.01.2010 vyniesienaja pastanova, zhodna ź jakim Haładamor ukrainskaha naroda 1932-1933 hadoŭ pryznany hienacydam, a pradstaŭnikoŭ orhanaŭ dziaržaŭnaj ułady SSSR Iosifa Stalina, Viačasłava Mołatava, Łazara Kahanoviča i inšych pryznanyja vinavatymi ŭ arhanizacyi i ździajśnieńni dadzienaha złačynstva», — havorycca ŭ zajavie.
Paviedamlajecca, što na siońniašni dzień vyjaŭlena bolš za 250 siemjaŭ — patencyjnych paciarpiełych, a ŭ jakaści śviedak i paciarpiełych dapytana 63 čałavieki, ź jakich — 45 žycharoŭ časova akupavanaj terytoryi AR Krym.
U hetaj kryminalnaj spravie składzieny rejestr asob, u dačynieńni da jakich asabista i ich siemjaŭ pradstaŭnikami Savieckaj ułady byli ździejśnienyja dziejańni pa hvałtoŭnym pierasialeńni.
Paviedamleńnie ab padazreńni ŭ złačynstvie departacyi krymskatatarskaha naroda i pradstaŭnikoŭ inšych nacyjanalnaściaŭ padpisała načalnik adździeła pracesualnaha kiraŭnictva pa kryminalnych vytvorčaściach śledčych prakuratury i padtrymańnia dziaržaŭnaha abvinavačvańnia AR Krym Śviatłana Błudava.
