Staršynioj asacyjacyi «Fiederacyja chakieja Biełarusi» na spravazdačna-vybarčaj kanfierencyi, što prachodziłaj 20 maja ŭ Minsku, abrany staršynia Minabłvykankama Siamion Šapira. Pra heta paviedamlaje BiełTA.
Šapira prakamientavaŭ svajo abrańnie.
«Fiederacyja ŭ apošnija hady pracy zrabiła vielmi mnohaje. Pra nas uvieś śviet daviedaŭsia jak pra chakiejnuju dziaržavu. Apošniaja pieramoha była zavajavanaja napiaredadni ŭ Kiolnie. Heta vielizarnaja zasłuha Ihara Račkoŭskaha. Majo proźvišča siarod chakieistaŭ vy nikoli nie čuli. Tak, ja ŭsio žyćcio pracavaŭ u sielskaj haspadarcy, ale, prybyŭšy ŭ Hrodna i staŭšy hubiernataram, palubiŭ chakiej. Ubačyŭ peŭnyja praviły: u Hrodnie zaŭsiody isnavała kalehijalnaje abmierkavańnie ŭsich pytańniaŭ, što i davała peŭnyja vyniki. Zrešty, usiudy pryncypy kiravańnia padobnyja. Nie schilny rabić kadravyja čystki, adnak usie mianie viedajuć, jak čałavieka žorstkaha i patrabavalnaha. Biez hetaha nie byvaje vynikaŭ», — cytuje novaha kiraŭnika fiederacyi «Priessboł».
Napiaredadni «Priessboł» atrymaŭ nieaficyjnuju infarmacyju, što raniejšy staršynia, Ihar Račkoŭski padaŭ u adstaŭku.
Pra stan u biełaruskim chakiei nieadnarazova krytyčna vykazvaŭsia Alaksandr Łukašenka. Zbornaja Biełarusi na čempijanacie śvietu zmahałasia za vyžyvańnie ŭ elicie, zaniała 13-je miesca. Ź inšaha boku, u piatnicu stała viadoma, što Biełaruś i Łatvija atrymali prava pravieści ŭ 2021 hodzie čempijanat śvietu.
Siamion Šapira raniej (da 2013) uznačalvaŭ Hrodzienski abłvykankam, byŭ ministram sielskaj haspadarki (da 2010). Jon doktar ekanamičnych navuk i syn navvkoŭca-ahrarnika, prafiesara Barysa Šapiry.
