Pistalet PSN-V, raspracavany kampanijaj «Biełśpiecźnieštechnika», pradstaŭleny na vystavie MILEX-2017, paviedamlaje BiełTA.
«Pistalet śpiecyjalna raspracavany dla apieratyŭnaha składu, — raspavioŭ kanstruktar pieršaha biełaruskaha pistaleta Ihar Vasiljeŭ. — Jon spatrebicca tam, dzie nieabchodna schavanaje našeńnie pad lohkaj cyvilnaj formaj adzieńnia».
Biełaruski pistalet całkam ŭpisvajecca ŭ habaryty rasijskaha pistaleta PSM, ale pry hetym maje kalibr nie 5,45 mm, a 9 mm.
Asnoŭnyja plusy PSN-V — kampaktnyja habaryty i mahutny kalibr. U pistaleta vielmi nizka raźmieščany stvoł adnosna dałoni, heta źmianšaje padkidańnie. Za košt pravilnych suadnosin stvała i zatvora addača ŭsprymajecca miakčej.
«Pry takoj taŭščyni pistaleta jaho mahutnaść značna bolšaja. Anałahičnaj takoj zbroi ja nie viedaju», — adznačyŭ kanstruktar.
Ideja stvaryć pistalet isnavała ŭžo daŭno, adnak uvasoblena jana była na praciahu apošniaha hoda. Zbroja ŭžo prajšła sprobnyja strelby. Napieradzie pravierka na tryvałaść (pistalet pavinien biez pałomak adstralać nie mienš za 5 tys. razoŭ) i dziaržaŭnyja vyprabavańni.
VIII Mižnarodnaja vystava ŭzbrajeńnia i vajennaj techniki MILEX-2017 prachodzić u Minsku 20-22 maja. U joj biaruć udzieł amal 140 ekspanientaŭ ź Biełarusi, Hiermanii, Kitaja, Kazachstana, Rasii, Słavakii i Ukrainy.
