Brytanskija hazieta The Guardian atrymała dostup da mietadyčnych ukazańniaŭ dla maderataraŭ Fejsbuka, pavodle jakich jany pavinny reahavać na supraćpraŭny kantent. U dapamožnikach možna znajści rekamiendacyi pa reahavańni na publikacyi z suicydam, parnahrafijaj, hvałtam, kanibalizmam, zabojstvam i navat źniavahaj Donalda Trampa.
Supracoŭniki Facebook apracoŭvajuć takuju vialikuju kolkaść dadzienych, što na pryniaćcie rašeńnia ŭ maderataraŭ jość kala 10 siekund. U supracoŭnikaŭ internet-hihanta jość dakładnyja rekamiendacyi, jak reahavać na tuju ci inšuju situacyju, chacia časam pryniać rašeńnie ŭ zaležnaści ad rehijanalnaha kantekstu vielmi ciažka. U roznych kulturach razumieńnie hvałtu i parnahrafii moža adroźnivacca, tamu toje, što źjaŭlajecca dla jeŭrapiejca ci amierykanca hvałtam, dla žychara Azii moža być usiaho tolki relihijnym abradam. Prablema ŭźnikaje i z tym, što ličyć parnahrafijaj, a što — eratyčnym mastackim tvoram.
Voś asnoŭnyja praviły, jakimi kirujucca maderatary Fejsbuka pry pracy sa śpiecyfičnym kantentam.
- Kali niechta na videa pahražaje zabić Donalda Trampa — takoje videa nieabchodna vydalać. Ale kali niechta kaža, što «skrucić hałavu» Trampu, to takija vyrazy možna ličyć vobraznymi i nie vydalać videa.
- Videa z hvałtoŭnaj śmierciu taksama nie zaŭsiody pavinna adrazu vydalacca, bo ŭ niekatorych vypadkach moža dapamahčy z rasśledavańniem abstavin.
- Dazvalajecca prapuskać videa z abortami, kali na ich adsutničaje halizna.
- Nie varta vydalać videa z pakarańniem dziaciej, kali hetaje pakarańnie nie prapahanduje sadyzm, a źjaŭlajecca častkaj vychavańnia.
- Videa z hvałtam z žyviołaŭ mohuć zachoŭvacca, ale tolki kali aŭtar hetym videa choča pakazać svaju zakłapočanaść i paznačaje, što nielha tak abychodzicca z žyviołami.
- Videa z haliznoj rekamiendujecca nie vydalać, kali jano źjaŭlajecca abjektam mastactva, a nie seksualnaj ciahi.
- Žyvyja efiry sa sprobaj samahubstva ci samapaškodžańnia taksama nie varta vydalać, bo dziakujučy takim tranślacyjam možna daviedacca, dzie čałaviek znachodzicca, i dapamahčy jamu.
