Biełarus, fotakarespandent ahienctva Associated Press Siarhiej Hryc znachodzicca ciapier u napaŭrazburanym hruzinskim horadzie Hory, jaki patrapiŭ pad abstreły rasiejskaha vojska.
Siońnia, u sieradu, užo paśla dasiahnieńnia damoŭlenaści pra advod vojskaŭ, spadar Hryc bačyŭ, jak praz horad prajšła kalona rasiejskaj vajskovaj techniki: «Kalona prykładna z 50 hruzavikoŭ, 5 BTRaŭ kala treciaj hadziny dnia vyjšła z Hory ŭ bok Tbilisi. Nie dajaždžajučy kilametraŭ 40 da Tbilisi, jany zbočyli ŭ lesapałasu i stali tam lahieram. Achoŭvali kalonu niekalki hruzavikoŭ z zenitkami. U kalonie išoŭ furhon chutkaj dapamohi, u jakim było kala dziasiatka paŭdniovaasetynskich dobraachvotnikaŭ. Kali kalona zbočyła ŭ les, to jany viarnulisia nazad u Hory. Nijakaha supracivu ci kantrolu ni z boku hruzinskaj palicyi, ni z boku hruzinskaha vojska hetaja kalona nie sustreła. Tut prosta niama ni hruzinskaha vojska, ni palicyi».
Pavodle Siarhieja Hryca, sałdaty, jakija jechali ŭ kalonie, paviedamili, što jany prybyli ŭ Hruziju z Čačni. Inšyja zachodnija fotakarespandenty bačyli siońnia na centralnaj płoščy Hory 10 rasiejskich tankaŭ, a niekalki mašyn z zenitkami zabłukali i prajechali dalej pa darozie na Tbilisi, a potym viarnulisia da miesca stajanki asnoŭnaj kalony. Nijakich sutyknieńniaŭ pamiž rasiejcami i hruzinami ŭ Hory siońnia nie było, śviedčyć Siarhiej Hryc.
«Ciapier z Tbilisi ŭ Hory jedzie dyplamatyčny kanvoj, kab razabracca ŭ sytuacyi. Kala nas jany jašče nie prajechali».
Siarhiej Hryc vykazaŭ taksama svaje ŭražańni ad ubačanaha ŭ horadzie Hory: «Horad zusim pusty, učora tam zahinuli žurnalisty padčas abstrełu, hareli damy. Na centralnaj płoščy Hory, dzie staić statuja Stalina (heta jahonaja radzima), było niekalki vyboinaŭ ad vybuchaŭ rakiet. Pabityja šyby ŭ bankach i ofisach, jakija stajać pustyja. Harać kvatery, jakija nichto nia tušyć, bo niama kamu. Paŭsiul valajucca vialikija metaličnyja i plastmasavyja askiepki, i ludzi dumajuć, što heta častki bombaŭ. Vulicy absalutna pustyja. Ludzi źjaŭlajucca na ich tolki zredku».
