Navukoŭcy ŭ ZŠA madyfikavali važny antybijotyk vankamicyn u nadziei spravicca z adnoj z samych niebiaśpiečnych u śviecie bakteryj, piša VBS.
Enterakok. Vyjava SPL
Jak paviedamlaje štotydniovik Nacyjanalnaj akademii navuk ZŠA PNAS, novaja viersija lekaŭ stvarałasia ź vielizarnym zapasam tryvałaści i stała ŭ tysiaču razoŭ macniejšaj za staruju.
Jana zmahajecca z tak zvanymi supierbakteryjami adrazu tryma sposabami, praktyčna nie pakidajučy im šancaŭ na vyžyvańnie.
Zrešty, novyja leki jašče tolki treba budzie vyprabavać na žyviołach, a zatym i na ludziach.
Hrupa navukoŭcaŭ z Daśledčaha instytuta Skrypsa spadziajecca, što ŭ vypadku paśpiachovych kliničnych vyprabavańniaŭ madyfikavany vankamicyn možna budzie ŭžyvać užo praź piać hadoŭ.
Ekśpierty ŭžo nie raz papiaredžvali, što my staim na parozie «post-antybijotykavaj epochi», kali niekatoryja infiekcyi pierastanuć paddavacca lačeńniu.
Siarod infiekcyj, jakija ciažka paddajucca lačeńniu i vyklikajuć aściarohi ŭ daktaroŭ, vyłučajuć vankamicyn-rezistentny entierakok (VRE).
VRE byŭ znojdzieny ŭ balnicach, jon moža vyklikać surjoznyja infiekcyi ran i zaražeńnie kryvi i, pa dumku SAAZ, ujaŭlaje surjoznuju pahrozu čałaviečamu zdaroŭju.
Niekatoryja antybijotyki pa-raniejšamu efiektyŭnyja suprać VRE, adnak vankamicyn, jakomu ŭžo 60 hadoŭ, u dadzienym vypadku biaśsilny.
Hrupa navukoŭcaŭ ź Instytuta Skrypsa vyrašyła vyśvietlić, ci zmohuć jany pieraŭtvaryć vankamicyn i adnavić jaho zabojnuju siłu.
Jany madyfikavali malekularnuju strukturu staroha preparata takim čynam, kab jon maksimalna paśpiachova atakavaŭ bakteryi ŭ samym ŭraźlivym miescy, rujnujučy ich kletkavyja ścienki.
Try madyfikacyi akazalisia stratehična najbolš važnymi, padvysiŭšy siłu i praciahłaść dziejańnia lekaŭ.
«Spačatku my ŭnieśli adno źmianieńnie ŭ malekułu vankamicynu, jakoje dazvoliła vyrašyć prablemu ŭstojlivaści da hetaha preparata, — tłumačyć doktar Dejł Bodžer, jaki kiravaŭ hrupaj daśledčykaŭ. — A zatym my ŭnieśli ŭ malekułu jašče dźvie nievialikich źmieny, jakija adkryli lekam dva novyja sposaby źniščeńnia bakteryj».
Takim čynam u antybijotyka źjaviłasia adrazu try, jak my ich nazyvajem, «miechanizmy» zabojstva bakteryj, — praciahvaje navukoviec. — I ŭstojlivaść da takoha antybijotyka budzie vielmi ciažka raźvić. Bo hetaja malekuła stvoranaja śpiecyjalna dla vyrašeńnia prablemy ŭźniknieńnia rezistentnaści».
Madyfikavany praparat zdoleŭ zabić ŭzory VRE ŭ łabaratornych umovach i praktyčna nie straciŭ svajoj efiektyŭnaści paśla 50 cykłaŭ pracy z bakteryjami.
«Žyvyja arhanizmy nie ŭ stanie adnačasova šukać šlachi abychodu troch niezaležnych miechanizmaŭ ich źniščeńnia, — kaža doktar Bodžer. — Navat kali jany znojduć rašeńnie adnoj prablemy, jany ŭsio roŭna buduć zabityja dvuma inšymi. Tak što daktary mohuć vykarystoŭvać madyfikavany vankamicyn, nie bajučysia ŭźniknieńnia ŭstojlivaści da jaho».
