Homielskaha błohiera Maksima Filipoviča pryraŭniali da ŚMI. Na aŭtara sacyjalnych rolikaŭ skłali pratakoł pa žurnalisckim artykule 22.9 za niezakonny vyrab i raspaŭsiud infarmacyi. U materyjałach spravy kanstatujecca, što «błohier faktyčna zamianiŭ saboj dziaržaŭnyja telekanały».
Sam Maksim Filipovič ličyć takuju acenku svajoj dziejnaści pryznańniem.
«Ja ŭ šoku, ščyra kažučy. Ja dumaŭ, što mianie pryciahnuć da adkaznaści za kankretnuju niejkuju pravinu. Naprykład, nie spadabałasia kamuści štości na niejkim videa. Ale ŭsio akazałasia inakš. Jany prosta ŭziali roliki ź jutuba, dałučyli ich da spravy i paličyli heta raspaŭsiudam infarmacyi ŭ ŚMI. To bok, kali ŭ vas jość kanały na jutubie ci inšych resursach, to rychtujciesia, što vas pryciahnuć da administracyjnaj adkaznaści. Źniali na videa viasielle — artykuł. Parazmaŭlali la padjezda z susiedziami — brali, značycca, intervju», — miarkuje jon.
U materyjałach administracyjnaj spravy ŭ adnosinach Maksima Filipoviča fihurujuć 17 videarolikaŭ i naŭprostavych tranślacyj, jakija rabiŭ błohier na roznyja sacyjalnyja temy.
