Zamarazki da minus dvuch hradusaŭ naziralisia miescami ŭ Biełarusi ŭ noč na 3 červienia, na asušanych tarfianikach u Bresckaj vobłaści - da minus piaci hradusaŭ, paviedamili ŭ Respublikanskim centry pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Minpryrody.
Samy nizki pakazčyk zafiksavany na mieteastancyi Paleskaja - piać hradusaŭ nižej za nul, što źviazana ź nizkaj ciepłapravodnaściu hleby ŭ hetych miescach. U siarednim tempieratura pavietra ŭ načny čas skłała 1-5 hradusaŭ sa znakam plus (u Breście da siami hradusaŭ ciapła).
«Zamarazki ŭ červieni dosyć redkaja źjava, ale siensacyi ŭ hetym niama. U pavietry (na vyšyni 2 m) jany mohuć adznačacca na abmiežavanych terytoryjach, u asnoŭnym u pieršaj i druhoj dekadach miesiaca, prykładna adzin raz u 20 hadoŭ i radziej. Na pavierchni hleby zamarazki nazirajucca čaściej - u siarednim adzin raz u 10 hadoŭ. Na asušanych tarfianikach jany paŭtarajucca davoli časta na praciahu ŭsiaho miesiaca i mahčymyja kožny druhi hod «, - adznačyli sinoptyki.
Siaredniaja miesiačnaja tempieratura červienia na 3-3,5 hradusa vyšej, čym u mai, i składaje ŭ siarednim pa respublicy plus 16,2 hradusa. Chaładniej za ŭsio na paŭnočnym zachadzie krainy ŭ rajonie Śviancianskaha ŭzvyšša (plus 15,2 hradusa), ciaplej za ŭsio na paŭdniovym uschodzie ŭ Homielskim Paleśsi (plus 17,1).
U Biełarusi samy ciopły červień u paślavajennyja hady byŭ ŭ 1999 hodzie ź siaredniamiesiačnaj tempieraturaj pavietra 20,5 hradusa vyšej za nul, najbolš chałodny - u 1962 i 1976 hadach, kali siaredniamiesiačnaja tempieratura pavietra skłała plus 13,8 hradusa.
Absalutny maksimum tempieratury pavietra za ŭvieś pieryjad mietearałahičnych nazirańniaŭ - plus 35,6 hradusaŭ - zarehistravany 23 červienia 1964 hoda ŭ Bierazino, absalutny minimum - minus 2,3 hradusa - adznačany nočču 1 červienia 2001 hodu na mieteastancyi Paleskaja i 11 červienia 1982 hady ŭ Oršy. Pieravažnaja dzionnaja tempieratura pavietra ŭ červieni - plus 20-23 hradusy, nočču - 9-12 hradusaŭ vyšej za nul.
