U Minsku pad adkrytym niebam pakazali biełaruskamoŭny miuzikł «Čyhunka», u jakim razam sa zvyčajnymi akciorami ihrajuć dzieci z aŭtyzmam.
Interaktyŭny śpiektakl sabraŭ na Dziciačaj čyhuncy 35 akcioraŭ i bolš za 300 hledačoŭ, a asablivy kałaryt pastanoŭcy nadało prybyćcio sapraŭdnaha ciahnika, raspaviali ŭ Siamiejnym inkluziŭ-teatry «i» i kampanii velcom, jakija vystupili arhanizatarami teatralnaha śviata.
Pastanoŭka była prymierkavana da Mižnarodnaha dnia abarony dziaciej i pakazana biaspłatna dla ŭsich žadajučych. Pierad publikaj vystupili 35 akcioraŭ, u tym liku dzieci z aŭtyzmam, i 50 junych čyhunačnikaŭ. U jakaści asnoŭnaj dekaracyi - pieron Dziciačaj čyhunki, jaki atrymałasia harmanična źviazać ź siužetam pjesy.
Pierad śpiektaklem vystupiŭ maładziožny teatr «Koła», jaki zdoleŭ uciahnuć hledačoŭ u teatralnaje dziejstva i ździvić šoŭ z dresiravanym sabakam. Paśla «razahrevu» na stancyju prybyła «Čyhunka»: junyja akciory Siamiejnaha inkluziŭ-teatra ŭvasabili na scenie siužet pjesy, napisanaj chłopčykam z aŭtyzmam. Paśla śpiektakla hledačam i junym akcioram razdali pavietranyja šary i prapanavali ździejśnić pajezdku pa dziciačaj čyhuncy.
Miuzikł «Čyhunka» nie maje anałahaŭ u śviecie. Pjesa napisana na biełaruskaj movie pa kazcy dziciaci z aŭtyzmam Kastusia Žybula. Jana raspaviadaje pra siabroŭstva, dabro i prava na pamyłku. U «Čyhuncy» šmat inšaskazańniaŭ, adsyłak da viadomych tvoraŭ, u tym liku Janki Maŭra, Karnieja Čukoŭskaha, Luisa Kerała i Uiljama Šekśpira. U joj padkreślivajecca unikalnaść kožnaha čałavieka, umieńnie pavažać i prymać asablivaści inšych ludziej.
«Śpiektakl pad adkrytym niebam staŭ dla hledačoŭ cikavym vopytam. Junyja akciory pastajanna staviać sabie bolš składanyja zadačy i hatovyja ihrać jak na prafiesijnaj scenie, tak i pad adkrytym niebam, - adznačyŭ načalnik adździeła karparatyŭnych kamunikacyj velcom Viačasłaŭ Śmirnoŭ. - Usiaho za paŭtara hoda Siamiejny inkluziŭ-teatr «i» stvaryŭ kalektyŭ, jaki źmianiaje ludziej i daje nadzieju na toje, što hramadstva budzie hatova pryniać «asablivych» chłopčykaŭ i dziaŭčynak i daść im šaniec prajavić svaje talenty».
Takoha ž mierkavańnia prytrymlivajucca i ŭ Siamiejnym inkluziŭ-teatry. «Pastanoŭka stała vialikaj padziejaj nie tolki dla dziaciej, jakija ŭ joj zadziejničany. Hledačy, jakija pryniali ŭdzieł u teatralnym śviacie, byli pryjemna ździŭleny tym, što ŭbačyli. Choć, kali ščyra, my mocna pieražyvali, što ŭsio moža pajści nie tak. Ale našy maleńkija akciery byli sabranymi i prajavili svaje zdolnaści pieršakłasna, - pryznałasia mastacki kiraŭnik Iryna Puškarova. - Takija mierapryjemstvy dazvalajuć źmianić staŭleńnie hramadstva da dziaciej z aŭtyzmam».
Śpiektakl «Čyhunka» - vynik supracoŭnictva Ciamiejnaha inkluziŭ-teatra i kampanii velcom, a padrychtoŭkaj junych akcioraŭ biazvypłatna zajmałasia tvorčaja studyja Iryny Puškarovaj. Premjera śpiektakla z pośpiecham prajšła 2 krasavika ŭ Minsku. Admietnaść pastanoŭki zaklučajecca ŭ tym, što na adnoj scenie ihrajuć jak zvyčajnyja, tak i asablivyja dzieci. Na dadzieny momant heta samy maštabny inkluziŭny śpiektakl, jaki kali-niebudź stavili z udziełam dziaciej z aŭtyzmam ŭ SND i Uschodniaj Jeŭropie.
