Art-mieniedžar i hrafici-mastak Aleh Łaryčaŭ byŭ zatrymany nočču z 3 na 4 červienia na vulicy Mahiloŭskaj razam sa svajoj dziaŭčynaj. Ich uziali paśla naniasieńnia trafareta.
«Nas viali ad padjezda. Zatrymlivaŭ AMAP — my nie paśpieli adyści na 300 mietraŭ, jak nas skrucili. Reštu nočy praviali ŭ SIZA, paśla — na Akreścina», — paviedamiła dziaŭčyna Aleha.
Pakul što i Aleh, i jaho dziaŭčyna Hanna znachodziacca ŭ RAUS Kastryčnickaha rajona.
Abvinavačvajuć maładzionaŭ u łajancy matam i naniasieńni hrafici (to bok, škodzie majomaści).
***
Razhladaŭ spravu sudździa Vital Siamionaŭ. Aleha Łaryčava i jaho dziaŭčynu Hannu Novik vinavacili ŭ drobnym chulihanstvie. Usio standartna: nibyta Aleh i Hanna «hučna łajalisia matam u adras minakoŭ (u 2.40 nočy) i supracoŭnikoŭ milicyi».
Śviedkam, jak zvyčajna, vystupiŭ adzin z supracoŭnikaŭ milicyi, jakija zatrymlivali Aleha i Hannu.
Pa jaho słovach, u tuju noč jon pracavaŭ u cyvilnaj formie. maładziony pavodzili siabie padazrona, tamu jon z kaleham vyrašyli «pachadzić za imi, pahladzieć». Pabačyli, jak chłopiec ź dziaŭčynaj štości namalavali na ścianie — i ich zatrymali. Padčas zatrymańnia Aleh z Hannaj łajalisia matam, zapeŭniŭ milicyjant.
Što malavali — nieviadoma. «Tam taki malunak, što ja nie zrazumieŭ, što namalavana», — pryznaŭsia milicyjant.
Pierad sudom Łaryčaŭ skazaŭ, što chacieŭ pasprabać namalavać trafaret, pryśviečany «Biełamu lehijonu».
Na malunku pavinien byŭ być mužčyna za kratami. Ale skončyć jaho nie paśpieli.
FOTAFAKT: Hrafici ŭ padtrymku «Biełaha lehijona», jakoje chacieŭ namalavać Łaryčaŭ
Hanna Novik aštrafavanaja na 10 bazavych (230 rubloŭ).
Za dźvie hadziny sudździa tak i nie zdoleŭ vyrašyć, što rabić z Łaryčavym. Prysud hraficistu budzie ahučany 6 červienia ŭ 10.30. Pakul što jon vyzvaleny.
***
Aleh Łaryčaŭ raniej adsiadzieŭ 5 sutak za nibyta «machańnie rukami i niecenzurnuju łajanku», da taho Łaryčava aštrafavali na 1150 rubloŭ nibyta za damaloŭku kalučaha drotu na murale «Maskva-Minsk». Na pačatku krasavika Łaryčaŭ byŭ źbity nieviadomymi, napadnikaŭ dahetul nie znajšli. Sam Aleh źviazvaŭ i źbićcio, i zatrymańni z hrafici na «Ścianie Ščotkinaj».