Upraŭleńnie spravami prezidenta pazbaviłasia najbujniejšych vytvorcaŭ małaka, miasa i harodniny. Pra heta paviedamlaje «Zaŭtra tvajoj krainy».
AAT «Parachonskaje», jak i dva inšyja najbujniejšyja małočnyja haspadarki krainy, pierajšło sa składu AK «Mačuliščy» va ŭłasnaść Bresckaj vobłaści. Fota z sajta zautra.by
Najbujniejšy ahrachołdynh krainy «Ahrakambinat «Mačuliščy», jaki ŭvachodzić u skład Kiraŭnictva spravami prezidenta, zaviaršyŭ pieradaču bolšaj častki svaich aktyvaŭ dziaržavie — Bresckaj i Viciebskaj abłaściam.
U vyniku kiraŭnik spravami Viktar Šejman pazbaviŭsia troch najbujniejšych vytvorcaŭ małaka ŭ Biełarusi i haspadarak, jakija ŭvachodziać u lik nacyjanalnych lidaraŭ pa vyroščvańni ptuški, bujnoj rahataj žyvioły i harodniny.
Infarmacyju pra toje, što AK «Mačuliščy» pa daručeńni prezidenta ŭžo pieradaŭ častku svaich aktyvaŭ va ŭłasnaść vobłaści, «Zaŭtra tvajoj krainy» paćvierdzili ŭ Bresckim abłvykankamie. Na aficyjnym sajcie prezidenckaha ahrachołdynhu, jaki da maja hetaha hoda abjadnoŭvaŭ 23 sielhaspradpryjemstvy, ciapier u jaho struktury značycca tolki dziesiać.
Rašeńnie ab biazvypłatnaj pieradačy AK «Mačuliščy» va ŭłasnaść Respubliki Biełaruś akcyj 12 sielskahaspadarčych tavarystvaŭ było pryniata ŭ krasaviku hetaha hoda. 11 ź ich raźmieščanyja na terytoryi Bresckaj vobłaści i adno — na Viciebščynie.
U vyniku pieraraźmierkavańnia aktyvaŭ niekali najbujniejšy sielskahaspadarčy chołdynh krainy pazbaviŭsia pierapracoŭčaj vytvorčaści — Pružanskaha małočnaha kambinata — i vialikaj častki svajoj syravinnaj małočnaj bazy.
Sa składu AK «Mačuliščy» va ŭłasnaść Bresckaj vobłaści pierajšli try najbujniejšyja małočnyja haspadarki krainy. Pa vynikach 2016 hoda hoda AAT «Ružany-Ahra» vyrabili 40,6 tys. ton małaka, AAT «Žuraŭlinaje» 35,7 tys. ton, AAT «Parachonskaje» — 31,1 tys. ton. Vobłaści taksama dastałasia haspadarka «Pačapava» (11 tys. ton małaka), jakaja śpiecyjalizujecca na jałavičynie, «Baćkaŭščyna», jakaja ŭvachodzić u pieršuju dziasiatku pa vytvorčaści brojleraŭ, AAT «Kamaroŭka», a taksama «Pinsksaŭhasbud», «SPMK-28», «Rembud» i «Rybhas «Paleśsie».
Na Viciebščynie AK «Mačuliščy» i USP pierastali być haspadarami najbujniejšaha ciapličnaha kambinata rehijona — «Rudakova».
Ciapier z bujnych sielhaspradpryjemstvaŭ u składzie chołdynhu zastalisia «Aleksandryjskaje», «Vasiliški» i «Cichiničy». U 2016 hodzie jany vyrabili, adpaviedna, 31 tys., 36 tys. i 25 tys. ton małaka. «Aleksandryjskaje», da taho ž, jašče i adzin z najbujniejšych u krainie vytvorcaŭ śvininy.
Z čym źviazanaja nieabchodnaść takoj rearhanizacyi chołdynhu, nie kamientujucca: krynicy spasyłajucca na adpaviednaje daručeńnie prezidenta.
Stvareńnie chołdynhu «Mačuliščy» pačałosia ŭ 2004 hodzie pad ehidaj Nacyjanalnaha banka i jaho tahačasnaha kiraŭnika Piatra Prakapoviča. Płanavałasia pradać hety aktyŭ stratehičnamu inviestaru za miljard dalaraŭ.
U 2013 hodzie «Mačuliščy» pierajšli pad kantrol Kiraŭnictva spravami prezidenta, jakoje ŭ tym ža hodzie ŭznačaliŭ Viktar Šejman. Pry im skład chołdynhu padvoiŭsia. U jaho strukturu byli pieradadzienyja sielskahaspadarčyja aktyvy «Biełarusbanka», Pružanski małočny kambinat i inšyja pradpryjemstvy.
